Endurheimti bróður sinn og er efst eftir fyrsta dag á síðasta móti ársins

Lexi Thompson lék fyrsta daginn á 65 höggum eða sjö höggum undir pari. Hún getur endurtekið afrek sitt frá 2018 þegar hún vann einnig lokamót tímabilsins.

Thompson byrjaði hringinn frábærlega og fékk fimm fugla á fyrstu sjö holunum. Hún endaði með átta fugla og einn skolla á hringnum.

Danski kylfingurinn Nanna Koerstz Madsen er aðeins einu höggi frá toppsætinu eftir fyrsta daginn en í þriðja sætinu eru þær Megan Khang, Sei Young Kim og Caroline Masson sem léku allar á fimm höggum undir pari.

Lexi Thompson naut góðs af því að vera búin að endurheimta kylfusveininn sinn en bróðir hennar Curtis Thompson var ekki með henni á Opna bandaríska risamótinu um síðustu helgi.

„Ef við erum heima þá við erum við alltaf að spila golf saman og grínast í hvoru öðru,“ sagði Lexi Thompson sem fagnar því að endurheimta bróður sinn í hlutverk kylfusveins.

„Það er frábært að hafa hann með mér. Ég met það mikils að hann sé tilbúinn að hjálpa mér og aðstoðaða mig við að halda andrúmsloftinu léttu. Hvort sem ég spila vel eða illa þá fær hann mig alltaf til að brosa,“ sagði Thompson.

Sigurvegarinn fær 1,1 milljón dollara eða meira en 140 milljónir íslenskra króna. Þetta er það mesta sem konurnar geta unnið á einu móti á LPGA-mótaröðinni.

Útsending frá öðrum degi CME Group Tour meistaramótsins hefst klukkan 18.00 á Stöð 2 Golf en sýnt verður frá mótinu alla helgina.

Öll stærstu golfmótin eru á Stöð 2 Golf en upplýsingar um útsendingar má finna hér. Stöð 2 Golf kostar 3.990 krónur á mánuði en er einnig hluti af Sportpakkanum. Helgarpassa að Stöð 2 Golf má kaupa á kerfum Vodafone.