Bjartviðri og allt að tólf stiga frost

Sunna Kristín Hilmarsdóttir skrifar 22. desember 2020 06:55

Það er hæð yfir landinu. Henni fylgir bæði bjartviðri og kuldi. Vísir/Vilhelm

Það er hæð yfir landinu í dag með tilheyrandi hægviðri í flestum landshlutum nema á Austfjörðum þar sem verður norðvestan strekkingur. Þetta kemur fram í hugleiðingum veðurfræðings á vef Veðurstofu Íslands.

Þá má vænta stöku smáélja norðan- og austanlands en annars verður víða léttskýjað.

„Þessum hæga vindi og bjartviðri fylgir þó nokkur kuldi og verður frost á öllu landinu, frá 1 stigi syðst niður í 12 stig í innsveitum norðaustanlands.

Í kvöld er síðan von á skilum að vestanverðu landinu með vestan kalda, ögn hækkandi hita og éljagang en á morgun er aftur útlit fyrir hægan vind, bjartviðri og nokkurn kulda á landinu,“ segir í hugleiðingum veðurfræðings.

Veðurhorfur á landinu:

Minnkandi norðlæg átt, fremur hæg um hádegi, en 8-13 m/s austast. Bjart með köflum en lítilsháttar él norðan- og austanlands. Gengur í vestan 5-13 og él vestantil síðdegis og í kvöld, fyrst á Vestfjörðum.

Vestlæg átt, 5-10 m/s á morgun, en lengst af 8-13 suðaustantil. Bjartviðri, en stöku él með norður- og suðurströndinni. Frost 0 til 12 stig, kaldast inn til landsins norðaustanlands. Vaxandi sunnanátt vestanlands og þykknar upp annað kvöld.

Á miðvikudag (Þorláksmessa):

Vestan 3-8 m/s, skýjað með köflum, og stöku él hér og þar. Frost 0 til 10 stig, kaldast í innsveitum fyrir norðan.

Á fimmtudag (aðfangadagur jóla):

Gengur í hvassa sunnanátt með rigningu, einkum sunnan- og vestanlands. Hlýnar talsvert, hiti 1 til 7 stig síðdegis.

Á föstudag (jóladagur):

Suðvestanátt, allhvöss sunnan- og vestantil. Él, en léttir til austanlands. Hiti um og undir frostmarki.

Á laugardag (annar í jólum):

Norðlæg eða breytileg átt og víða dálítil él. Frost um allt land.

Á sunnudag:

Ákveðin norðlæg átt með snjókomu eða él fyrir norðan og austan, en þurrt að kalla syðra. Frost 0 til 5 stig.

Veður