Stoltir heima­menn í Liði ára­tugarins: Daníel Lax­dal og Eiður Aron Sigur­björns­son

Annar þátturinn af „Liði áratugarins“ á Stöð 2 Sport var á Stöð 2 Sport í gær en þar voru kynntir tveir fyrstu leikmenn úrvalsliðs efstu deildar í knattspyrnu frá 2010 til 2020.

Lið áratugarins 2010 til 2020 var valið af Stöð 2 Sport en sérfræðingarnir Tómas Þór Þórðarson, Reynir Leósson, Sigurvin Ólafsson og Logi Ólafsson segja álit sitt álit á þeim leikmönnum sem urðu fyrir valinu í þáttum milli jóla og nýárs.

Garðar Örn Arnarson leikstýrir þáttunum sem verða sex talsins en í hverjum þætti verða tveir meðlimir úrvalsliðsins kynntir til leiks. Þetta eru ellefu byrjunarliðsmenn og einn þjálfari.

Fyrstu tveir leikmenn úrvalsliðsins sem kynntir voru í þættinum í fyrradag voru markvörðurinn Hannes Þór Halldórsson og varnarmaðurinn Pétur Viðarsson. Í gær bættust svo við þeir Daníel Laxdal og Eiður Aron Sigurbjörnsson.

Varnarmaður númer tvö er Daníel Laxdal

Daníel Laxdal hefur leikið allan sinn feril með Stjörnunni. Hann lék sinn fyrsta leik með meistaraflokki félagsins árið 2004.

Á árunum 2010 til 2020 lék hann 215 deildarleiki fyrir Stjörnuna af þeim 264 sem liðið spilaði á þeim tíma.

Hann var lykilmaður liðsins er liðið varð Íslandsmeistari í fyrsta og eina skipti árið 2014 og var ekki í minna hlutverki er Stjarnan varð bikarmeistari árið 2018 með 4-1 sigri á Breiðabliki í Laugardalnum.

Hann hefur verið fastamaður í vörn liðsins en oft á tíðum skeiðað upp völlinn og sýnt listir sínar með boltann, framar á vellinum.

„Ef þú vilt komast lengra þá verðurðu að leggja aukalega á þig og sýna metnað. Ég var ekki bestur í að nenna æfa aukalega. Þá hefði ég kannski farið út og misst af titlunum svo, svona er þetta,“ sagði Daníel. Logi Ólafsson segir Daníel einn af aðalmönnunum í Garðabænum.

„Daníel Laxdal er sérstakur knattspyrnumaður. Hann hefur spilað með Stjörnunni í öllum deildum og einn af aðalmönnunum á bak við árangur liðsins í Garðabænum,“ sagði Logi áður en Daníel tók aftur við boltanum.

„Mér finnst persónulega geggjað að vera alltaf í sama liðinu, mínu liði. Uppalinn og ég get ekki talað fyrir aðra en að vinna titil fyrir sitt lið. Mér finnst það extra sætt. Ég er þakklátur og stoltur að hafa tekið þátt í uppbyggingu félagsins og að skrifa söguna.“

Varnarmaður númer þrjú er Eiður Aron Sigurbjörnsson

Eiður Aron Sigurbjörnsson er þriðji varnarmaðurinn af fjórum sem er nú kominn í liðið.

Hann lék með ÍBV árin 2010 og 2011 á þessum áratugi áður en hann fór í atvinnumennsku þar sem hann lék meðal annars með Örebro og Sandnes Ulf.

Hann var þó lánaður til ÍBV tímabilin 2013 og 2014 áður en hann snéri svo alfarið heim til Vals eftir veru hjá Holsten Kiel.

Þar lék Eyjapeyjinn við hvurn sinn fingur og varð Íslandsmeistari með liðinu í þrígang; 2017, 2018 og 2020. Hann spilaði á síðasta ári einnig sinn fyrsta og eina A-landsleik.

Fyrr í þessum mánuði var þó tilkynnt að Eiður ætlaði að snúa aftur heim; hann hafði samið við ÍBV um að leika með liðinu á næsta ári en liðið leikur í fyrstu deildinni.

„Það kom mér eilítið á óvart,“ sagði Reynir Leósson, sparkspekingur um þá ákvörðun Eiðs Arons að snúa aftur heim til Eyja. „Hann er Eyjamaður og taugin er greinilega sterk þangað. Það kemur ekki á óvart að hann fari heim en mér finnst hann enn á því „leveli“ að hann eigi að spila í efstu deild á Íslandi. Hann er ekki á leiðinni niður á við svo fyrst hann fór frá Val, besta liði á Íslandi, þá kom mér það á óvart að hann myndi ekki fara í lið í toppbaráttunni á Íslandi en kannski hefur þetta vera leiðin að losna frá Valsmönnum.“

„Þetta er búið að vera frábær tími hjá Val og hef ekkert nema gott að segja um þjálfarana og leikmennina. Þetta eru strákar sem verða mér vinir að eilífðu. Mér fannst ég standa í stað og svo hefur viljað heim í einhvern tíma. ÍBV fór ekki upp og mér fannst það undir mér komið að sýna Eyjahjarta og hjálpa liðinu upp því þeir eiga heima í efstu deild. Þeir eru með topp aðstæður og þetta er félag með mikla sögu. Þetta var ekki ósætti í Val. Þetta eru fjölskylduástæður,“ sagði Eiður sjálfur.

Í kvöld verður sýndur næsti þáttur af „Liði áratugarins“ en þá verða tveir aðrir leikmenn úrvalsliðsins kynntir til leiks. Þátturinn hefst klukkan 19.30 á Stöð 2 Sport.