Ellefu smit greindust síðasta sólarhringinn

Staðfest smit nýs afbrigðis kórónuveiru sem veldur Covid-19-sjúkdómnum eru nú alls 1.771 hér á landi. Staðfestum smitum fjölgaði því um ellefu milli daga.

Alls eru nú 28 innlagðir og fjórir á gjörgæslu vegna Covid-19. Þá hafa 1.328 náð bata. 1.220 einstaklingar eru í sóttkví og 434 í einangrun sem er fækkun milli sólarhringa. 17.891 hafa lokið sóttkví. Sýni hafa verið tekin úr 42.762 samanborið við 41.091 í gær. Enginn lést af völdum veirunnar síðasta sólarhringinn, en alls hafa níu látist hér á landi.

Klukkan tvö verður haldinn upplýsingafundur almannavarna og landlæknis þar sem farið verður yfir stöðu mála í sambandi við faraldurinn og farið yfir aðgerðir til að sporna við útbreiðslu kórónuveirunnar.

Víðir Reynisson, yfirlögregluþjónn og Þórólfur Guðnason, sóttvarnalæknir munu fara yfir stöðu mála með tilliti til COVID-19 hér á landi.