Snorri Sturluson fangar ameríska drauminn

Ritstjórn Albumm skrifar 3. febrúar 2021 14:30

Snorri Sturluson opnar um helgina ljósmyndasýningu með forvitnilegum myndum sem fanga bandarískan hversdagsleika.

Snorri Sturluson, ljósmyndari, auglýsingamaður, kvikmyndagerðarmaður og heimspekingur opnar ljósmyndasýninguna American Dream í Gallery Port á laugardaginn, 6. febrúar, klukkan 14.

Myndirnar á sýningunni tók Snorri þegar hann bjó í New York á árunum 2001 til 2017. Sýningin er óður til borgarinnar og fólksins sem byggir hana, sem og rannsókn á félagslegum, pólitískum og sálrænum veruleika bandarísks samfélags eins og það birtist í New York. En fyrst og fremst er hún upplifun og sýn Snorra á daglegt líf hans sjálfs í borginni sem aldrei sefur.

Á sýningunni eru 40 myndir sem verða til í takmörkuðu upplagi, eða þrjú prent af hverri mynd.

Sýningin American Dream er upplifun og sýn Snorra á daglegt líf hans sjálfs í borginni sem aldrei sefur.Snorri Sturluson

Snorri hefur gefið út eina ljósmyndabók, Laundromat 2013, og haldið einkasýningar í New York og Los Angeles. Hann hefur ekki sýnt ljósmyndaverk áður í Reykjavík en árið 1995 hélt hann sýningu ásamt Lárusi Jóhannessyni á lágmyndum úr steinsteypu og malbiki sem bar nafnið Ferðin til tunglsins.

Hægt er að kynna sér viðburðinn nánar á Facebook.

Þessi grein birtist fyrst á Albumm.is. Albumm var stofnaður árið 2014 og fjallar um íslenska tónlist og menningu frá öllum hliðum. Hægt er að hafa samband í albumm@albumm.is.

Menning Ljósmyndun