Ó­boðnir gestir ruddust í sam­kvæmi ung­menna

Þá barst lögreglu tilkynning um líkamsárás í vesturbæ Reykjavíkur klukkan eitt í nótt. Sá sem er grunaður um árásina hafði þá yfirgefið vettvang en var handtekinn í nótt og vistaður í fangaklefa. Árásarþolinn var fluttur með sjúkrabifreið á bráðadeild með höfuðáverka eftir árásina.

Rúmlega klukkustund fyrr, klukkan hálf tólf, hafði annar maður verið handtekinn í miðbæ Reykjavíkur eftir tilkynningu um slagsmál. Sá var ofurölvi og fór ekki að fyrirmælum lögreglu. Var hann vistaður í fangageymslu sökum ástand síns.

„Mikil fíkniefnalykt“ frá íbúð 

Um klukkan hálf átta í gærkvöldi hafði lögregla afskipti af pari í íbúð í Kópavogi. Mikil fíkniefnalykt var sögð koma frá íbúðinni og fundust þar plöntur, tilbúið efni og búnaður til ræktunar. Parið er grunað um vörslu og ræktun fíkniefna.

Þá sinnti lögregla umferðareftirliti víða á höfuðborgarsvæðinu í gærkvöldi og í nótt. Fimm ökumenn voru kærðir fyrir ýmis umferðarlagabrot eftir klukkutímalangt umferðareftirlit í Breiðholti í gærkvöldi, til að mynda vegna brota gegn stöðvunarskyldu og merkjagjöf.

Á öðrum tímanum í nótt var svo tilkynnt um umferðaóhapp í Ártúnsbrekku eftir að bíll endaði utan vegar. Ökumaðurinn er grunaður um ölvun við akstur og var hann vistaður í fangageymslu lögreglu.

Fimm ökumenn voru stöðvaðir á höfuðborgarsvæðinu vegna gruns um fíkniefnaakstur og akstur eftir sviptingu ökuréttinda. Í einu tilviki er einnig grunur um brot á vopnalögum og vörslu fíkniefna.

Rétt eftir miðnætti var svo sautján ára ökumaður stöðvaður, grunaður um akstur undir áhrifum fíkniefna. Eftir sýnatöku var ökumanninum ekið heim og tilkynning send til Barnaverndar um málið.