The Players hefst í dag: „Skrýtið að eiga enn titil að verja“

McIlroy vann The Players árið 2019 í fyrsta sinn. Þar sem að Tiger Woods er á sjúkrahúsi eftir bílslys hefur enginn keppenda í ár unnið mótið oftar en einu sinni, og nær ómögulegt virðist að spá fyrir um sigurvegara að þessu sinni.

Efsti maður heimslistans, Dustin Johnson, er þó sigurstranglegastur hjá veðbönkum en fast á hæla hans koma Jon Rahm, Bryson Dechambeau, Justin Thomas og McIlroy.

Kylfingar náðu aðeins að leika einn hring í fyrra áður en mótið var blásið af vegna kórónuveirufaraldursins. McIlroy lék þann hring á 72 höggum, eða á pari TPC Sawgrass vallarins, og var því kannski ekki eins svekktur og sumir aðrir yfir því að mótinu væri slitið.

Rýr uppskera eftir að faraldurinn hófst

„Ég held að mér líði aðeins betur með það en Hideki [Matsuyama, sem lék á 63 höggum],“ sagði McIlroy í vikunni.

„Ef að mér leið illa fyrir hönd einhvers í fyrra þá var það Hideki. Þetta var augljóslega magnaður fyrsti hringur. Ég fékk fugla á síðustu þremur holunum og náði pari, svo það hefði getað verið verra,“ sagði McIlroy.

„Það er frekar skrýtið að eiga enn titil að verja eftir að hafa ekki unnið í tvö ár. En það er gott að vera kominn aftur og vonandi get ég byrjað betur en í fyrra. Náð að spila á 60 og eitthvað höggum, vera ekki of langt frá efsta manni og byggja ofan á það,“ sagði McIlroy.

McIlroy hefur ekki unnið mót síðan á HSBC mótinu í Kína ári 2019. Frá því að keppni hófst að nýju í júní í fyrra, eftir hlé vegna faraldursins, hefur McIlroy spilað á 19 mótum en aðeins tvisvar endað í hópi fimm efstu.

Bein útsending frá The Players hefst kl. 17 í dag á Stöð 2 Golf. Mótið verður spilað næstu fjóra daga og verður í beinni útsendingu á stöðinni.

Öll stærstu golfmótin eru á Stöð 2 Golf en upplýsingar um útsendingar má finna hér. Stöð 2 Golf kostar 3.990 krónur á mánuði en er einnig hluti af Sportpakkanum. Helgarpassa að Stöð 2 Golf má kaupa á kerfum Vodafone.