Sjö greindust innan­lands síðustu þrjá sólar­hringa

Þetta kemur fram í uppfærðum tölum á síðunni covid.is, en síðan hefur ekki verið uppfærð síðan á föstudag. Ekki hafa fleiri greinst innanlands á sama degi síðan 14. janúar.

55 eru nú í einangrun, en þeir voru 35 á föstudaginn. 196 eru nú í sóttkví, en voru 129 á föstudag. 1.014 eru nú í skimunarsóttkví. Þrír eru nú á sjúkrahúsi vegna Covid-19.

Á landamærum greindust nítján síðustu þrjá sólarhringa.

• Föstudagur: Einn greindist en sá reyndist vera með mótefni.
• Laugardag: Sjö greindust – tveir með virkt smit í fyrri landamæraskimun, þrír með virkt smit í seinni skimun, einn reyndist vera með mótefni og er beðið eftir niðurstöðu mótefnamælingar í tilviki eins.
• Sunnudagur: Ellefu greindust, þar af tíu með virkt smit í fyrri skimun og er niðurstöðu mótefnamælingar beðið í tilviki eins. 

Greint var frá því í gær að tíu skipverjar á súrálsskipi, sem lagðist við höfn á Reyðarfirði á laugardag, hafi greinst með kórónuveiruna.

Nýgengi innanlandssmita, þ.e. fjöldi smitaðra á hverja 100 þúsund íbúa undanfarnar tvær vikur, er nú 3,3, en var 2,5 á föstudag. Nýgengi landamærasmita er nú 11,5, en var 7,9 á föstudag.

15.066 eru nú fullbólusettir hér á landi og er bólusetning hafin hjá 22.887 til viðbótar.

6.119 manns hafa nú greinst með kórónuveiruna hér á landi frá því faraldurinn hófst í lok febrúar. Þá hafa 29 dauðsföll verið rakin til Covid-19 á Íslandi frá upphafi faraldursins.

Fréttin hefur verið uppfærð.