Innlent

Rukka tíu þúsund fyrir hverja nótt í farsóttarhúsi

Erla Björg Gunnarsdóttir skrifar
Ríkisstjórnarfundur í Ráðherrabústaðnum
Ríkisstjórnarfundur í Ráðherrabústaðnum Foto: Vilhelm Gunnarsson/Vilhelm Gunnarsson

Hótel í Reykjanesbæ, Reykjavík, fyrir norðan og á Austfjörðum munu taka á móti farþegum frá rauðum löndum sem þurfa að fara í fimm daga sóttkví í farsóttarhúsi samkvæmt reglugerð sem tekur gildi 1. apríl.

Svandís Svavarsdóttir, heilbrigðisráðherra, segir að það verði áskorun að manna farsóttarhús fyrir norðan og austan en það sé nauðsynlegt. „Því það eru fleiri hlið inn í landið. Norræna kemur til dæmis austur og vélar í millilandaflugi norður.“

Reiknað er með að nokkur hundruð manns muni þurfa að vera í fimm daga sóttkví í farsóttarhúsi á fyrstu dögum apríl. „Við sjáum nokkurn veginn hve margir koma á fyrstu dögunum en það er skrýtinn tími núna vegna páskafrís, fólk að ferðast meira. En þetta eru einhver hundruð manns.“

Sunna Sæmundsdóttir ræddi við Svandísi Svavarsdóttur í hádeginu að loknum ríkisstjórnarfundi.

Fyrst þegar reglugerðin var kynnt var talað um að ríkið myndi standa undir öllum kostnaði við farsóttarhúsin en nú hefur ráðherra lagt fram nýja tillögu.

„Ég geri að tillögu minni að það verði gjald fyrir þetta, tíu þúsund fyrir hvert herbergi fyrir nóttina. En það tekur ekki gildi strax, það þarf tíu daga að minnsta kosti svo það geti tekið gildi upp á fyrirsjáanleikann. En það verður eitthvað upp í kostnaðinn,“ segir Svandís Svavarsdóttir og gerir ráð fyrir að gjaldtaka hefjist 11. apríl. Fæði er innifalið í gjaldinu og gildir einu hvort einn dvelji í herberginu eða fleiri einstaklingar sem ferðast saman.

Þórólfur Guðnason, sóttvarnalæknir, sagði í hádegisfréttum Bylgjunnar að flest smitin innanlands síðustu daga megi rekja til ferðamanns sem ekki virti sóttkví. Mætti herða meira í því ljósi?

„Þetta eru ráðstafanir í samræmi við tillögur sóttvarnalæknis. Við vonum að það dugi til að þétta. Nú eru stífari kröfur innanlands en áður, við gripum hratt til ráðstafana, það ásamt þessum hertu aðgerðum á landamærum verða vonandi til þess að þessi bylgja verði styttri og rísi ekki eins hátt.“

Lönd og landsvæði sem eru dökkrauð eða grá má sjá að neðan

Evrópa innan EES

  • Belgía
  • Búlgaría
  • Eistland
  • Frakkland
  • Holland
  • Ítalía
  • Kýpur
  • Liechtenstein
  • Malta
  • Noregur
  • Pólland
  • Rúmenía
  • Spánn
  • Slóvakía
  • Slóvenía
  • Svíþjóð
  • Tékkland
  • Ungverjaland

Evrópa utan EES

  • Andorra
  • Kósovó
  • Moldóva
  • Norður Makedónía
  • San Marínó
  • Serbía
  • Svartfjallaland

Afríka

  • Kamerún
  • Tansanía
  • Vestur Sahara
  • Seychelles eyjar

Ameríkur

  • Bonaire, Sint Eustatius og Saba
  • Curaçao
  • Arúba
  • Úrúgvæ

Asía

  • Norður Kórea
  • Tadsíkistan
  • Túrkmenistan
  • Jórdanía
  • Líbanon
  • Palestína
  • Barein

Eyjaálfa

  • Aðrar franskar Kyrrahafseyjar

Að neðan má sjá tilkynningu af vef stjórnarráðsins í heild sinni.

  • Börn fædd 2005 eða síðar skulu fara í sýnatöku á landamærum Íslands frá og með 1. apríl næstkomandi.
  • Gerð verður krafa um að farþegar sem framvísa bólusetningarvottorði eða vottorði um fyrri sýkingu fari í eina sýnatöku við komuna til landsins.
  • Ferðamenn sem koma frá skilgreindum áhættusvæðum skulu dvelja í sóttkví eða einangrun í sóttvarnahúsi milli fyrri og síðari sýnatöku.
  • Allir ferðamenn skulu forskrá fyrir komuna til landsins hvaða dag þeir fara aftur af landi brott, liggi það fyrir.

Frá og með 11. apríl verður innheimt gjald af ferðamönnum fyrir dvöl í sóttvarnahúsi.

Heilbrigðisráðherra setur reglugerð um ofangreindar breytingar sem gerðar eru í samræmi við tillögur sóttvarnalæknis. 

Sýnataka og sóttkví barna: Börn fædd 2005 eða síðar fara í sýnatöku á landamærunum. Ferðist barn með einstaklingi sem skylt er að sæta sóttkví dvelur barnið þar með honum og losnar úr sóttkví ef síðara sýni úr samferðamanni er neikvætt. Ef samferðamaðurinn er undanþeginn sóttkví er barnið það sömuleiðis. Barn sem ferðast eitt þarf ekki að fara í sóttkví.

Sýnataka hjá einstaklingum með vottorð: Krafa um sýnatöku hjá einstaklingum með bólusetningarvottorð eða vottorð um fyrri sýkingu er sett vegna vísbendinga um að þessir einstaklingar geti borið smit. Þeir þurfa ekki að sæta sóttkví en skulu bíða niðurstöðu úr sýnatöku á dvalarstað. Krafan er tímabundin og verður endurskoðuð fyrir 1. maí.

Skilgreind áhættusvæði: Þeir sem koma frá skilgreindum áhættusvæðum skulu dvelja í sóttkví eða einangrun í sóttvarnahúsi. Þetta á við ferðamenn frá löndum eða landsvæðum þar sem 14 daga nýgengi smita á hverja 100.000 íbúa er yfir 500 (dökkrauð svæði) eða fullnægjandi upplýsingar um svæðið liggja ekki fyrir (grá svæði), samkvæmt upplýsingum frá Sóttvarnastofnun Evrópu, sbr. meðfylgjandi listi yfir þau lönd sem um ræðir. Áætlað er að listinn verði næst uppfærður 9. apríl nk. 

Sérstakar varúðarráðstafanir 

Ráðstafanir vegna falsaðra vottorða: Ef minnsti grunur vaknar um að einstaklingur hafi framvísað fölsuðu vottorði verður hann skyldaður í tvöfalda sýnatöku með sóttkví á milli í sóttvarnahúsi.

Ef dvalartími er stuttur: Ferðamanni er skylt að forskrá brottfarardag frá Íslandi liggi hann fyrir. Ef dvalartími er skemmri en nemur áskildum tíma í sóttkví verður það kannað sérstaklega, enda hætt við að viðkomandi muni ekki fylgja reglum um sóttkví.

Gjaldtaka vegna dvalar í sóttvarnahúsi frá 11. apríl

Frá 11. apríl skulu þeir sem dvelja í sóttvarnahúsi greiða gjald fyrir dvöl í sóttvarnahúsi. Gjaldið nemur 10.000 kr. fyrir herbergi hverja nótt og er fæði innifalið. Gildir þá einu hvort einn dvelur í herberginu eða fleiri einstaklingar sem ferðast saman.

Faraldur kórónuveiru (COVID-19) Keflavíkurflugvöllur Ferðamennska á Íslandi Ríkisstjórn Katrínar Jakobsdóttur

Tengdar fréttir

Mest lesið


Fleiri fréttir

Sjá meira


×

Mest lesið