Vill skipta yfir í ódýrari hraðpróf við landamærin

Sigríður var spurð hvað hún gerði mætti hún ein ráða aðgerðum við landamærin.

„Ég myndi fara að huga að því að taka út aðra skimun eftir komuna og svo þurfa menn auðvitað líka að fara að huga að því hvort ekki sé hægt að fara að styðjast við meiri hraðpróf og ódýrari próf, sem hafa verið þróuð og eru tilbúin, í stað þessara PCR-prófa sem eru mikið inngrip.

Ég hef gert fyrirvara við skimun á börnum og ungabörnum með þessi PCR-próf á landamærum hér, sem eru ekki framkvæmd af fagaðilum. Hún er gríðarlegt inngrip og getur valdið tjóni ef hún er ekki rétt gerð. Þannig að ég held að við ættum að fara að horfa í einhverjar einfaldari skimanir,“ sagði Sigríður.

Veiran dettur ekki af himnum ofan

Inga Sæland, formaður Flokks fólksins, kvaðst þvert á móti vilja loka landinu fyrir allri umferð ferðamanna, alltént allri „ónauðsynlegri umferð.“ Ef fólk komi til landsins skuli það skilyrðislaust í sóttvarnahús á vegum stjórnvalda.

Þeir sem fá undanþágur til dvalar á eigin heimili í sóttkví skulu að mati Ingu sjálfir greiða fyrir það og sæta eftirliti yfirvalda meðan á sóttkvínni stendur.

„Við erum búin að sjá það að það hefur ekki alveg haldið. Menn hafa verið að brjóta sóttkví alls staðar og við höfum verið að takast á við mikla vá ítrekað af því að það eru þarna úti einstaklingar sem virða hvorki heiður né sóma. Þeir brjóta þessar reglur og gefa lítið fyrir aðra samlanda sína,“ sagði Inga.

„Það er sárara en tárum taki að horfa upp á það hvernig fólk tekur því með léttúð sem er að gerast í heiminum. Þar sem við erum fámennt lítið samfélag norður á hjara veraldar var okkur í lófa lagið að lifa í veirufríu landi, ekkert að læra að lifa með veirunni, ekki neitt slíkt, við vitum öll hvaðan hún kemur. Hún kemur um landamærin. Hún dettur ekki af himnum ofan,“ sagði Inga.

Heilbrigðisstarfsfólk á meðal þeirra sem eru að koma heim til Íslands

Sigríður Andersen sagði að Íslendingar væru háðir því að fá fólk frá útlöndum og hingað til lands til að vinna hér ýmis störf. Það gildi jafnt um sjúkrahúsin og í sjávarútvegi. Þannig hefði alger lokun landsins haft lamandi áhrif á atvinnulífið.

„Ef menn ætla að taka upp svona aðgerðir eins og Inga er að leggja til að hér hefði átt að gera, hefðu menn því þurft að svara því hvort hér ætti að fresta lífsnauðsynlegum aðgerðum.“

„Ef mönnum hefði hugnast þessi aðgerð, af hverju komu þeir ekki með þessa tillögu í janúar? Flokkur fólksins hefur ekki lagt fram nokkurt einasta þingmál eða gert eina einustu tillögu um þetta,“ sagði Sigríður.

Umræðurnar má sjá í heild í Víglínu dagsins, þar sem einnig er rætt við Svandísi Svavarsdóttur heilbrigðisráðherra. Hér að neðan er brot úr öðrum hluta þáttarins.