Líflegt við Elliðavatn í gær

Það voru fínar aðstæður við vatnið í gær og þegar það lægði alveg sáust margar uppítökur víða um vatnið. Fyrstu toppflugurnar sáust við vatnið í gær að okkur vitandi og það var það sem silungurinn var að sækjast í . Þeir sem kunna vel á vatnið voru flestir að setja í fisk og þeir sem áttu besta kvöldið voru yfirleitt að nota þurrflugu eða púpur sem líkja eftir toppflugu að klekjast út í yfirborðinu. 

Það er nokkurn veginn sama hvar var drepið niður fæti, það var líflegt um allt vatn. Þingnesið var mjög líflegt sem og allur bakkinn frá Þingnesi að Elliðavatnsbænum. Helluvatn kraumaði á tímabili og það sáust ansi vænir urriðar þar inn á milli eins til tveggja punda fiskana sem vatnið er hvað þekktast fyrir. Veðurspáin fyrir vikuna er ágæt svo síðdegisveiðin gæti klárlega verið málið enda lítið má að skjótast eftir vinnu og taka nokkur köst við vatnið.

Það má rétt skjóta á þá sem eru að byrja að veiða við vatnið að nota langa og granna tauma. Ef það er verið að nota púpur að draga þær löturhægt inn og eins er gott að vera með tökuvara.