„Ekkert endi­lega“ að hugsa um af­léttingar­á­ætlun stjórn­valda

Þrír af fjórum sem greindust með kórónuveiruna í sóttkví í gær, sem þó hafði staðið stutt. Þórólfur Guðnason sóttvarnalæknir sagði á upplýsingafundi almannavarna í dag að tekist hefði að rekja smit síðustu daga til smita í H&M og til landamæra.

Sóttvarnalæknir hefur áhyggjur af því að veiran hafi fengið að malla óáreitt í samfélginu.

„Hún er vissulega í lágmarki og það eru örugglega einhverjir sem fá hana mjög vægt, einkennalítið eða einkennalaust. En hún er enn þá þarna úti.“

Minnisblað Þórólfs verðu rætt á ríkisstjórnarfundi í fyrramálið. Núverandi reglugerð gildir til 27. maí en ráðherra reiknaði með því fyrr í vikunni að afléttingar tækju gildi strax eftir helgi. 

Miðað við stöðu bólusetninga á landinu og afléttignaráætlun stjórnvalda mætti þannig gera ráð fyrir að þá taki gildi minnst hundrað manna samkomubann og eins metra regla. En Þórólfur heldur þétt að sér spilunum.

„Ég er í sjálfu sér ekkert endilega að hugsa um þessa stefnumörkun ráðherra og ríkisstjórnarinnar sérstaklega. Ég er að horfa á faraldurinn, stöðu hans, og ýmsa þætti,“ sagði Þórólfur í dag.