Fýlu­púka­fé­lagið í Sjálf­stæðis­flokknum safnar vopnum sínum

Haraldur Benediktsson sagði í prófkjörsbaráttu að ef hann myndi ekki hreppa oddvitasætið myndi hann segja þetta gott. Sú varð reyndin, Þórdís Kolbrún Reykfjörð Gylfadóttir lagði hann næsta léttilega í prófkjöri flokksins í Norðvesturkjördæmi. En í kjölfarið komu vöflur á Harald, að hann hafi nú kannski ekki sagt þetta og nú vill Brynjar leggja sitt af mörkum til að losa hann úr klípunni.

Mikill fögnuður braust út á síðu Brynjars í gær þegar fyrir lá að hann ætlaði sér að taka sæti á lista Sjálfstæðisflokksins og í gamansamri Facebook-færslu sem Brynjar birti nú í morgun segir Brynjar að Haraldur sé undir feldi, líkt og hann sjálfur var, en það sé minkafeldur í tilfelli Haralds.

Kraftmikill dugnaðarforkur

„Þótt ég skilji mjög vel afstöðu Haraldar vil ég hvetja hann til þess að taka sæti á framboðslista Sjálfstæðisflokksins í Norðvestur kjördæmi,“ segir Brynjar og tekur svo til við að tíunda kosti Haralds. Þeir hafi nú starfað saman á þingi í átta ár og fullyrða megi að hann sé einhver öflugasti þingmaður þjóðarinnar.

„Þótt hann sé miðaldra karl og bóndi að auki. Hann er kraftmikill dugnaðarforkur sem hefur leitt mörg að mestu framfararmálum síðustu ára, ekki bara í eigin kjördæmi heldur um landið allt. Vandamálið með Harald er að hann er full hógvær og tranar sér ekki nægilega fram.“

Og þá telur Brynjar vert taka af öll tvímæli um að Haraldur sé leiðindaskarfur, því það er hann ekki.

„Þótt Haraldur sé nú um stundir formaður fýlupúkafélagsins er hann bráðskemmtilegur maður og fyndinn á sinn lúmska hátt. 

Það er engin hætta á að hann drepi mann úr leiðindum.“

Íhaldsöflin vilja nú brjóta odd af oflæti sínu

Brynjar, sem fær mikil og jákvæð viðbrögð við þessari hvatningu sinni til Haralds, að hann fari nú ekki að heiman, segir að á þing þurfi að vera fleiri sem hafi víðtæka reynslu úr atvinnulífinu og hafi notið trausts til ýmissa mikilvægra trúnaðarstarfa.

„Nóg er af þingmönnum sem varla hafa verið þátttakendur í atvinnulífinu og aldrei séð VASK skýrslu hvað þá fyllt slíka skýrslu út. Ég veit að Soffía frænka vill að Haraldur haldi áfram í stjórnmálum og ég veit líka að hann vill ekki fá hana í heimsókn á Vestri-Reyni með sópinn.“

Meta má það svo að íhaldssöm öfl hafi orðið undir í Sjálfstæðisflokknum og óttast ýmsir að þau muni leita til Miðflokksins. Þannig hlýtur það að vera léttir fyrir flokksforystuna ef sá hópur ætlar að brjóta odd af oflæti sínu og fara ekki í fússi. Þá má einnig túlka niðurstöður prófkjöranna þannig að um flokkinn hafi farið einskonar kvenfrelsisbylgja en konur innan flokksins brugðust einmitt mjög hart við ummælum Haralds um að hann myndi hætta ef hann væri ekki oddviti og túlkuðu það sem hótun.