Atvinnuleysi var 5,6 prósent í júní

Samanburður við maí 2021 sýnir að árstíðaleiðrétt atvinnuþátttaka, hlutfall starfandi og atvinnuleysi hélst nokkuð stöðugt á milli mánaða. Þetta segir í niðurstöðum vinnumarkaðsrannsóknar Hagstofu Íslands

Árstíðaleiðrétt atvinnuþátttaka og hlutfall starfandi jókst um 0,7 prósentustig og atvinnuleysi dróst saman um 0,1 prósentustig. 

Leitni hlutfalls starfandi hefur aukist um 0,9 prósentustig síðustu sex mánuði og leitni atvinnuleysis dregist saman um 0,3 prósentustig.

Mæling vinnumarkaðsrannsóknarinnar áætlar að 216.900 einstaklingar á aldrinum 16-74 ára hafi verið á vinnumarkaði í júní 2021 sem jafngildir 82,3 prósent atvinnuþátttöku. 

Af vinnuaflinu voru 206.700 starfandi og 10.200 atvinnulausir og í atvinnuleit. Hlutfall starfandi af mannfjölda var 78,4 prósent og hlutfall atvinnulausra af vinnuafli 4,7% prósent. 

Starfandi unnu að jafnaði 36,3 stundir í júní 2021. Samanburður við júní 2020 sýnir að atvinnuleysi jókst um 0,4 prósentustig á milli ára og hlutfall starfandi jókst um 0,6 prósentustig.

Áætlað er að 21.600 einstaklingar hafi haft óuppfyllta þörf fyrir atvinnu í júní 2021 sem jafngildir 9,8 prósent af vinnuafli og mögulegu vinnuafli. 

Af þeim voru 47,5 prósent atvinnulausir, 14,0 prósent tilbúnir að vinna en ekki að leita, 7,6 prósent í vinnuleit en ekki tilbúnir að vinna og 30,8 prósent vinnulitlir. 

Slaki á vinnumarkaði var nánast sá sami nú í júní 2021 og í júní 2020 þegar hann mældist 10,0 prósent.

Niðurstöður vinnumarkaðsrannsóknar fyrir júní 2021 ná til fimm vikna frá 31. maí til og með 4. júlí. Í úrtak völdust af handahófi 1.898 einstaklingar á aldrinum 16-74 ára með lögheimili á Íslandi. Þegar frá eru taldir þeir sem voru látnir eða búsettir erlendis var nettóúrtakið 1.867 einstaklingar. Alls fengust nothæf svör frá 1.182 einstaklingum sem jafngildir 63,3 prósent svarhlutfalli.