Stakk af eftir að hafa keyrt á átta ára barn

Í dagbók lögreglu segir að drengurinn hafi fundið til í kinn, olnboga og hné. Faðir hans hafi svo flutt hann á Bráðadeild til aðhlynningar.

Í nótt barst svo tilkynning um umferðarslys í Reykjavík þar sem bíl hafði verið ekið á umferðarmerki og fleira. Bíllinn var illa farinn en ökumaður hans ók honum af slysstað og á nærliggjandi bílastæði þar sem lögregluþjónar komu að honum.

Hann var þá handtekinn vegna gruns um ölvun við akstur.

Þá datt maður af hjóli í miðbænum í nótt með þeim afleiðingum að hann braut tönn. Lögreglan segir hann grunaðan um að hafa reynt að stýra hjóli undir áhrifum áfengis. Hann var fluttur á sjúkrahús í sjúkrabíl.

Um klukkan fimm í gær barst lögreglunni tilkynning um innbrot í Grafarvogi. Þar var búið að spenna upp glugga og stela verðmætum úr íbúð en eigendur eru erlendis. Í dagbók lögreglu segir að skömmu áður en tilkynning barst hafi par verið handtekið í hverfinu með bakpoka og töskur en þau voru grunuð um þjófnað.

Parið hafði meðal annars í fórum sínum gögn sem voru merkt eigendum íbúðarinnar.

Þá voru þó nokkrir ökumenn handteknir í gærkvöldi og í nótt vegna gruns um akstur undir áhrifum áfengis og/eða fíkniefna. Einn þeirra hefur aldrei fengið ökuréttindi og annar hefur ítrekað verið sviptur þeim.