Segir ó­skiljan­legt að sótt­varnir hér lúti ekki sömu lögum og er­lendis

Þórólfur Guðnason, sóttvarnalæknir, skilaði í vikunni inn tillögum að langtímaaðgerðum hér á landi. Margir hafa gagnrýnt nýju reglurnar og sagt þær of flóknar, óskiljanlegar jafnvel. Þá gagnrýndi Halldór Benjamín Þorbergsson, framkvæmdastjóri SA, reglur um sóttkví barna og ungmenna í skoðanagrein sem birtist á Vísi í vikunni.

Þar heldur hann því fram að við blasi að þúsundir barna muni lenda í sóttkví og fullbólusettir foreldrar þeirra og systkini í mörgum tilvikum, sem muni leiða til mikilla raskana á vinnumarkaði.

„Við erum að kalla eftir því að þessum spurningum verði svarað með sannfærandi hætti. Ef við eigum og þurfum að búa við stífari takmarkanir og strangari reglur en gengur og gerist annars staðar þarf að útskýra það,“ segir Ásdís Kristjánsdóttir, aðstoðarframkvæmdastjóri Samtaka atvinnulífsins í Sprengisandi á Bylgjunni í morgun.

Ásdís segir óskiljanlegt að ekki sé horft til annarra ríkja þar sem samfélög eru komin lengra með að læra að lifa með veirunni.

„Við þurfum að horfa til annarra ríkja, við þurfum að læra að lifa með veirunni. Sem dæmi nefnum við hraðprófin, af hverju erum við ekki að nota þessi hraðpróf víðar, eins og við erum að sjá erlendis. Sem betur fer erum við að sjá að það virðist vera samhljómur, hvort sem það er hjá stjórnarandstöðunni eða fulltrúum stjórnarflokkanna, finnst mér nú flestir vera sammála okkur, að við þurfum að eiga þetta samtal,“ segir Ásdís.

Leita þurfi leiða hvernig við Íslendingar getum lifað sem eðlilegustu lífi. Helga Vala Helgadóttir, þingmaður Samfylkingarinnar, tekur undir þetta. Hún hafi þó viljað fylgja ráðum sóttvarnalæknis þar sem hann sé helsti sérfræðingur þjóðarinnar í sóttvörnum og faraldursfræðum.

„En ég er alveg sammála þó þeirri línu sem kemur fram í máli Ásdísar og SA að við verðum að leita allra mögulegra leiða til að samfélagið geti starfað með sem eðlilegustum hætti. Þar hef ég annars vegar talað um þessi próf á landamærum og svo þessi hraðpróf. Af því að samfélagið til dæmis víða um Evrópu gengur á sem eðlilegastan hátt einmitt út af notkun á hraðprófum,“ segir Helga Vala.

Vandinn liggi í því að vilji sé fyrir hendi að halda samfélaginu opnu, að fólk þurfi sem minnst að fara í sóttkví og smitgát en svo aftur á móti séu foreldrar barna í skólum starfsmenn innan heilbrigðis- og velferðarkerfisins þar sem starfað er með viðkvæmum einstaklingum.

„Það er þetta fólk sem við erum öll sammála um að við verðum að vernda af því að heilbrigðiskerfið okkar er svo viðkvæmt út af pólitískum ákvörðunum að það ræður ekki við þetta,“ segir Helga.

„Hraðpróf má mjög auðveldlega nota og þau eru notuð út um allan heim.“

Ásdís áréttar það að Samtök atvinnulífsins meini ekki að sóttvarnalæknir hafi rangt fyrir sér í sínum tillögum. Þau kalli hins vegar eftir því að þær tillögur séu rökstuddar.

„Af því að verið erum að sjá það og finnum það, þau sem hafa ferðast erlendis í sumar, hvernig staðan er allt önnur þar. Þar er mun meira frelsi, það eru minni takmarkanir. Við erum að upplifa allt annað líf erlendis og það er auðvitað eðlileg krafa að sóttvarnayfirvöld komi og útskýri, með betri rökum en verið hefur, af hverju við erum að sjá þessar takmarkanir.“