„Það er ekki sjálfhverfa að setja sig í fyrsta sæti“

Ásdís var orðin mjög þreytt á sjálfri sér og því lífi sem hún lifði.

„Á þessum tíma var ég 95 kíló og rosalega ósátt með lífið, ég var alltaf pirruð og reið,“ segir Ásdís um augnablikið þegar hún hlustaði á fyrirlestur David Goggins, sem sagðist áður hafa verið reiður og feitur.

„Hann horfir í augun á fimm þúsund manna sal og spyr

„Ef ég læsi ævisöguna þína, myndi hún hafa áhrif á mig?“

Ég veit ekki hvernig ég á að lýsa þessu, maður fór bara í trans. Nei þetta er ömurleg ævisaga sem ég er að skrifa. Ég er 48 ára, ég er 95 kíló, ég er orkulaus, ég vinn allt of mikið, ég er aldrei til staðar og ég er ótrúlega ósátt við mig. Ég var eiginlega í vondu sambandi við sjálfa mig.“

Ekkert sjónvarp í tvö ár

Þessi fyrirlestur breytti lífi Ásdísar og hugarfari til framtíðar.

„Ég hugsaði bara, ég get ekki skrifað þessa sögu lengur, mig langar ekki að vera þessi manneskja, mig langar ekki að mamman sem börnin nenna ekki að umgangast.“

Hún fór frá því að hugsa lítið sem ekkert um heilsuna yfir í það að hreyfa sig daglega, borða betur, minnka álag í vinnunni, vinna minna og skráði sig meðal annars í Landvættina.

„Ég horfði ekki á sjónvarp í tvö ár, fór að sofa klukkan tíu og vaknaði klukkan fimm á morgnana. Þá fann ég rútínuna mína.“

Ásdís byrjaði að hlaupa og hreyfa sig á morgnanna og það breytti miklu fyrir hana.

„Ég tók ákvörðun um að ég vildi ekki vera þessi manneskja lengur, af því að mér líkaði svo illa við hana,“ útskýrir Ásdís.

„Ég áttaði mig á því að vandamálið var alltaf ég.“

Maður þarf að fyrirgefa sjálfum sér

Ásdís segir að þegar hún horfi til baka sjái hún að það sé einfaldlega nauðsynlegt að taka skurðpunkt.

„Allt sem ég hef gert skiptir ekki máli. Allt sem ég hef sagt, allt sem ég hef gert illa, ég ætla aldrei að draga það upp.“

Ásdís var komin með nóg og tók málin í sínar hendur og byrjaði smám saman að hreyfa sig, hún fann að hún gat meira með hverjum deginum og ákvað meðal annars að skrá sig í Landvætti en það gengur út á að klára eina þraut í hverjum landsfjórðungi Íslands, gönguskíðakeppni á Vesturlandi, náttúruhlaup á norðurlandi og víðavatnssund á austurlandi.

„Maður þarf svolítið að fyrirgefa sjálfum sér allt sem að maður hefði viljað gera betur. Ef þú getur ekki fyrirgefið sjálfri þér, þá getur þú ekki náð bata. Næsti fasi var svo að hætta að hafa áhyggjur af hinum.“

Óumbeðnar athugasemdir

Ásdís segir að þegar hún lá uppi í sófa og horfði á sjónvarpið í marga klukkutíma öll kvöld, hafi enginn sagt neitt við hana. En þegar hún byrjaði að vakna snemma alla daga, æfa tvisvar á dag eða taka út sykur virtust allir vilja koma með óumbeðnar athugasemdir.

„Fólk hafði svo miklar skoðanir, ég fór náttúrulega í svo miklar öfgar.“

Hún svaf samt betur og leið betur, hreyfði sig og var miklu orkumeiri.

„Ég fékk enga gagnrýni þegar ég var vanvirk og óheilbrigð. Það hefur ekkert með þyngd að gera. Þú getur alveg verið 95 kíló og heilbrigð en ég var 95 kíló og óheilbrigð.“

Stolt af sér í dag

Ásdís segir að í dag sé hún með viðhorfið mér er alveg skítsama, gagnvart óumbeðnum athugasemdum og ráðleggingum frá fólki sem er ekki sérfræðingar.

„Lífið er miklu auðveldara hjá mér núna, andlega, líkamlega og sjálfsvirðingarlega.“

Ásdís hugsar einstaklega vel um heilsuna og hefur gert undanfarin ár, það hafa þó komið tímabil sem hún dettur aðeins úr gírnum og í eitt skiptið fannst henni hún detta of lengi úr gírnum og fann á sér að ekki var allt með felldu. Kom þá í ljós að hún var byrjuð á breytingaskeiðinu sem hafði mikil áhrif á hana og hún ákvað að hugsa enn betur um mataræðið, tók út allan sykur meðal annars úr mataræðinu sem hún segir hafa virkað mjög vel. 

„Ég er rosalega stolt af þessari konu sem ég er í dag. Mér líkar svakalega vel við hana. Þessi saga á erindi svo víða, af því að það eru svo margar Ásdísar þarna úti sem að gætu átt miklu betra líf ef þær myndu velja sig og setja sig í fyrsta sæti. Það er ekki sjálfhverfa að setja sig í fyrsta sæti, vegna þess að ef þú ert ekki í standi þá ertu ekki í standi fyrir neinn í kringum þig.“

Hún borðar betur og hefur sýnt frá ótrúlega girnilegum réttum á Instagram síðu sinni og hefur elsti sonur hennar hjálpað henni að elda frá grunni og einblína þau á fjölbreytta og holla matseld. 

Hægt er að skoða Instagram síðu Ásdísar HÉR.