Reykur í Alþjóðlegu geimstöðinni

Kjartan Kjartansson skrifar 9. september 2021 08:36

Frá Alþjóðlegu geimstöðinni á braut um jörðina. ESA/Thomas Pesquet

Viðvörunarkerfi í rússneska hluta Alþjóðlegu geimstöðvarinnar á braut um jörðu fór í gang þegar reykur greindist um borð. Geimfarar eru sagðir hafa ýmist séð reyk eða fundið lykt af brenndu plasti.

Reykskynjari fór í gang í svonefndu Zvezda-hylki þar sem áhöfn geimstöðvarinnar býr. Rafhlöður voru í hleðslu í hylkinu. Sjö geimfarar eru um borð í geimstöðinni.

Rússneska geimstofnunin Roscosmos segir að öll kerfi geimstöðvarinnar hafi virkað eftir að reykurinn greindist. Áform um geimgöngu síðar í dag eru óbreytt, að því er segir í frétt Reuters-fréttastofunnar.

Oleg Novitskí, rússneskur geimfari um borð í geimstöðinni, er sagður hafa séð og fundið lykt af reyk og Thomas Pesquet, franskur kollegi hans, hafa fundið lykt af brenndu plasti eða rafeindabúnaði sem lagði frá rússneska hluta geimstöðvarinnar inn í þann bandaríska.

Röð óhappa hefur orðið í Alþjóðlegu geimstöðinni, sem er komin nokkuð til ára sinna, upp á síðkastið. Rússneskir embættismenn telja að hugbúnaðarbilun eða möguleg mannleg mistök hafi valdið því að öll geimstöðin færðist úr hefðbundinni stöðu sinni í júlí.

Rússland Geimurinn Alþjóðlega geimstöðin

Tengdar fréttir

Hreyflar nýrrar einingar fóru óvænt í gang og færðu geimstöðina af réttri sporbraut

Eftir að ný rússnesk eining var tengd við Alþjóðlegu geimstöðina í dag, kviknaði óvænt á hreyflum einingarinnar svo geimstöðin færðist úr stöðu sinni á braut um jörðu. Hreyflarnir voru í gangi í nokkrar mínútur og voru hreyflar annarra eininga geimstöðvarinnar notaðir til að vega upp á móti hinum.

29. júlí 2021 18:40

Geimstöðin varð fyrir geimrusli

Alþjóðlega geimstöðin varð fyrir geimrusli í síðasta mánuði sem olli skemmdum á kanadíska vélarminum svokallaða. Armurinn virkar þó enn og virðist sem að ruslið hafi eingöngu valdið skemmdum á hitaskildi hans.

1. júní 2021 22:53

Mest lesið

Fleiri fréttir