Yfirlýsing UNICEF vegna aðgerða stjórnvalda í Eþíópíu

UNICEF hefur sent frá sér yfirlýsingu vegna þeirrar ákvörðunar stjórnvalda í Eþíópíu að vísa fulltrúa samtakanna og öðrum yfirmönnum Sameinuðu þjóðanna, úr landi. Ákvörðunin er sögð bæði sorgleg og mikið áhyggjuefni, að því er segir í yfirlýsingunni.

„UNICEF, Barnahjálp Sameinuðu þjóðanna, hefur haft starfsstöð í Eþíópíu í rúm 60 ár og á þeim tíma unnið ötullega að því að auka og verja réttindi barna í landinu. Nú þegar aðstæður fólks í landinu versna, og börn bera þar mestan skaða af, er starf okkar mikilvægara en nokkru sinni fyrr. Við eru fullviss um að teymin sem starfa á vettvangi við að bjarga lífi barna vinni þar sem fyrr með hlutleysi, mannúð og sjálfstæði að leiðarljósi. Vinna okkar þar mun halda áfram. Okkar helsta og eina forgangsatriði er að styðja við börn sem á aðstoð þurfa að halda, hvar svo sem þau eru.“

Stjórnvöld í Eþíópíu tilkynntu fyrir helgi að sjö yfirmönnum Sameinuðu þjóðanna í landinu, meðal annars frá UNICEF, hefði verið vísað úr landi fyrir „afskiptasemi að innanríkismálum.“

„Það var gert í kjölfar þess að Sameinuðu þjóðirnar lýstu yfir áhyggjum af því að vegatálmar stjórnvalda hindruðu nauðsynlegt hjálparstarf í landinu og ógnuðu fæðuöryggi hundruð þúsunda í Tigray-héraði. Mikil átök í norðurhluta Eþíópíu að undanförnu og mannúðarkrísa sem þeim hefur fylgt, hefur vakið hörð viðbrögð frá alþjóðasamfélaginu,“ segir í frétt UNICEF.