Á­kvörðun um fram­haldið í máli Gylfa lík­lega tekin á morgun

Gylfi Þór var handtekinn föstudaginn 16. júlí síðastliðinn vegna gruns um kynferðisbrot gegn ólögráða ungmenni. Síðan hann var handtekinn hefur Gylfi verið laus gegn tryggingu og gildir það fyrirkomulag þangaði til á laugardaginn, 16. október. Vegna þess að sá dagur er laugardagur er líklegast að lögreglan þurfi að taka ákvörðun um framhaldið á morgun. 

Samkvæmt heimildum fréttastofu hefur lögreglan þrjá möguleika. Hún gæti gefið út ákæru á hendur Gylfa, látið málið niður falla eða framlengt núgildandi fyrirkomulagi. Framlengingin gæti gilt frá nokkrum vikum upp í nokkra mánuði. 

Engin tímamörk á rannsókn mála

Rétt tæpir þrír mánuðir eru liðnir síðan Gylfi var handtekinn en rannsókn svona mála geta tekið langan tíma en engin tímamörk eru á rannsókn svona mála í Bretlandi. 

Til samanburðar má nefna mál knattspyrnumannsins velska Ryan Giggs, sem var handtekinn grunaður um heimilisofbeldi í nóvember í fyrra. Hann var ekki ákærður fyrir heimilisofbeldi fyrr en í apríl á þessu ári og liðu sex mánuðir frá því að hann var handtekinn og þar til hann mætti fyrir dóm, þar sem hann neitaði sök. 

Kom fljótt í ljós að Gylfi væri maðurinn

Málið hefur vakið mikla athygli, bæði hér heima og úti í Bretlandi þar sem Gylfi hefur spilað með knattspyrnuliðinu Everton í ensku úrvalsdeildinni. Slúðursögur fóru af stað á samfélagsmiðlum stuttu eftir að Gylfi var handtekinn en húsleit hafði verið gerð á heimili hans í Manchester á sama tíma og hann var handtekinn. Eftir skýrslutöku hjá lögreglunni var hann látinn laus gegn tryggingu. 

Strax daginn eftir handtökuna voru netverjar farnir að spekúlera um hvern hafi verið að ræða. Það var svo mánudaginn 19. júlí sem línur fóru að skýrast þegar Everton gaf út yfirlýsingu og staðfesti að leikmaður liðsins hefði verið settur í ótímabundið leyfi vegna lögreglurannsóknar.

Í yfirlýsingu liðsins kom fram að um væri að ræða 31 árs gamlan leikmann. Komu þá aðeins tveir leikmenn Everton til greina á umræddum aldri, Gylfi eða Fabian Delph. Stuttu síðar steig Delph fram og lýsti því yfir að hann væri ekki umræddur leikmaður. 

Það var svo þriðjudaginn 20. júlí sem fréttastofa fékk það staðfest hjá heimildarmanni að Gylfi væri umræddur leikmaður. Þrátt fyrir ítrekaðar tilraunir hefur hvorki náðst í Gylfa né umboðsmann hans frá því að málið komst í fjölmiðla. Gylfi hefur ekkert tjáð sig um málið.

Spilar hvorki með landsliðinu né Everton í vetur

Gylfi er ekki á lista Everton yfir þá leikmenn sem liðið hefur mátt tefla fram í leikjum frá 1. september og má því ekki spila fyrir liðið fyrr en í fyrsta lagi 1. janúar. Hann hefur því ekkert komið við sögu hjá liðinu í stjórnartíð Rafa Benítez sem tók við Everton í sumar.

Samningur Gylfa við Everton rennur út næsta sumar en hann var keyptur til félagsins frá Swansea fyrir metfé árið 2017, eða um 45 milljónir punda.

Gylfi lék síðast landsleik í nóvember í fyrra. Hann gaf ekki kost á sér í fyrstu leiki Íslands undir stjórn Arnars Þórs Viðarssonar, í lok mars, og bar því við að hann vildi ekki missa af fæðingu fyrsta barns þeirra Alexöndru Helgu Ívarsdóttur en þau eignuðust dóttur 5. maí. Frá því að Gylfi var handtekinn hefur Ísland leikið fimm leiki í undankeppni HM án hans.

Gylfi hefur leikið 78 A-landsleiki og var í fararbroddi íslenska liðsins sem komst í 8-liða úrslit á EM 2016 og í lokakeppni HM 2018. Hann hefur skorað 25 mörk sem er einu marki frá markameti Eiðs Smára Guðjohnsen og Kolbeins Sigþórssonar.