Víðir óttast bak­slag: „Vonandi hef ég rangt fyrir mér“

Sem stendur gilda sömu einangrunarreglur fyrir alla. Einangrun einstaklings sem greinst hefur með Covid-19 má aflétta þegar fjórtán dagar eru liðnir frá greiningu og sjúklingur hefur verið einkennalaus í sjö daga.

Í sérstökum tilvikum má læknir þó aflétta einangrun fyrir hraustan einstakling sem hefur verið með engin eða væg einkenni frá upphafi einangrunar, ef 10 dagar eru liðnir frá jákvæðu prófi og viðkomandi hefur verið einkennalaus í a.m.k. 3 daga,“ eins og segir á vef Landlæknis og almannavarna.

Víðir Reynisson yfirlögregluþjónn hjá almannavörnum sagði í beinni útsendingu í kvöldfréttum Stöðvar 2 í kvöld að verið væri að vinna að lokatillögum um styttingu einangrunar hjá bólusettum einstaklingum.

„Svo er líka stórt mál í þessu að við erum búin að vera að skoða sóttkvína og möguleikann á að stytta hana úr sjö dögum og jafnvel niður í fimm daga í ákveðnum tilfellum,“ sagði Víðir. Aðspurður sagði hann að mögulegt væri að einangrun yrði stytt úr tíu dögum niður í sjö. Nú væri það sérfræðinganna að fara yfir það.

Landspítalinn býr sig undir bylgjuna

Síðastliðna þrjá daga hafa samtals 214 manns greinst með kórónuveiruna hér á landi. Víðir telur augljóst að blikur séu á lofti í þróun faraldursins.

„Ef við skoðum bara 14 daga nýgengi, sem margir horfa til, þá erum við komin í 220 per 100 þúsund, sem er ansi hátt og erum enn á uppleið. Það eru ákveðnar blikur á loftir þarna og það hefur í sjálfu sér í tölfræðinni ekkert breyst um það að um tvö prósent þeirra sem sýkjast sem þurfa á spítalainnlögn að halda. Þannig að Landspítalinn er að undirbúa sig undir það að fá einhvern hluta af þessari bylgju til sín,“ sagði Víðir.

Hann telur mikilvægt að fólk hafi persónubundnar sóttvarnir hugfastar og fari í sýnatöku ef minnstu einkenna verður vart. Hann bendir á að í löndum þar sem ástandið sé betra en hér sé grímuskylda víða, sem ekki er við lýði hér. Hann hvetur fólk til að fara áfram varlega.

Óttastu bakslag?

„Já, ég er hræddur um það að við séum að horfa á byrjun á slíku. Vonandi hef ég rangt fyrir mér.“

Stjórnvöld hvetja áfram til bólusetningar

Stjórnvöld hafa gefið það út að yfir 34 þúsund einstaklingar yfir 12 ára aldri hafi ekki þegið bólusetningu við kórónuveirunni.

„Til að verja samfélagið gegn útbreiddu smiti og auknu álagi á heilbrigðiskerfið er mikilvægt að þeir sem ekki hafa þegar verið bólusettir þiggi slíkt boð. Þá skiptir einnig miklu máli að fólk þiggi örvunarbólusetningu sem stendur hún til boða samkvæmt ráðleggingum sóttvarnalæknis,“ segir í tilkynningu sem heilbrigðisráðuneytið gaf út í dag.