Guterres segir markmið COP26 „í öndunarvél“

António Guterres, framvkæmdastjóri Sameinuðu þjóðanna, sagði við AP fréttaveituna að markmið ráðstefnunnar, að tryggja að hlýnun verði ekki meiri en 1,5 gráður á þessari öld, sé komið í öndunarvél. 

Að hans mati er afar ólíklegt að ríkisstjórnir heimsins fáist til lofa að draga nægilega mikið úr útblæstri koltvísýrings til þess að það takist. 

Forseti ráðstefnunnar, Alok Sharma, hefur tekið í sama streng og segir að tíminn sé að renna út. 

Þjóðir heims höfðu þegar sæst á það í Parísarsamkomulaginu árið 2015 að halda hlýnun jarðar á milli einnar og hálfrar og tveggja gráða. 

Nýjustu mælingar gefa hinsvegar til kynna að hækkunin muni í raun nema 2,7 gráðum og því þarf verulega að draga úr útblæstrinum að sögn vísindamanna, ef ekki á að fara illa.