Tiger Woods og sonur hans náðu ellefu fuglum í röð

Tiger Woods sneri aftur á golfvöllinn í Orlando um helgina þar sem hann lék við hlið sonar síns í scramble höggleik.

Tiger ætlaði sér að hafa gaman af því að spila með syni sínum og að forðast það að fá skolla. Það tókst heldur betur hjá honum.

Þeir feðgar áttu einkar góðan seinni dag þar sem þeir náðu meðal annars fugli á ellefu holum í röð. Það endaði loks á átjándu holunni þar sem þurftu örn til að komast í efsta sætið. Báðir vippuðu framhjá holunni.

Það breytti ekki því að Tiger og Charlie léku seinni átján holurnar á 56 höggum eða fimmtán höggum undir pari. Þeir náðu þrettán fuglum, einum erni og pöruðu síðan fjórar holur.

John Daly og sonur hans John II unnu þar með mótið með tveimur höggum eftir að hafa spilað seinni daginn á 57 höggum. Þeir léku á 27 höggum undir pari samanlagt. Með þessari spilamennsku slógu þeir met Davis Love III og sonar hans frá því fyrir þremur árum. Það þurfti metframmistöðu til að vinna Woods-feðga.

„Við vorum orðnir heitir þarna og Charlie var að hitta kúluna ótrúlega vel. Það hefði auðvitað haft mikla þýðingu fyrir mig að vinna,“ viðurkenndi Tiger en það skipti líka miklu máli að hann gat spilað þessa helgi.

„Sú staðreynd að við gátum fengið þetta tækifæri í ár þegar fyrir aðeins nokkrum vikum vissi ég ekki hvort ég gæti þetta, en hér erum við. Ég naut þess í botn en vildi bara að ég hefði getað gengið brautirnar með honum og verið við hlið hans allan tímann eins og í fyrra,“ sagði Tiger sem fór um á golfbíl. Hann er enn að jafna sig eftir að hafa rústað fæti sínum í bílslysi í febrúar.

Tiger gekk síðustu metrana á lokaholunni en það fór ekkert á milli mála að hann fann meira og meira fyrir vinstri fætinum eftir því sem leið á mótið.