Sprengi­­­sandur: Heil­brigðis­ráð­herra, MeT­oo, við­horfs­rann­­­sóknir og for­seta­skiptin í Banda­ríkjunum

Í þætti dagsins mætir Þóra Ásgeirsdóttir, framkvæmdastjóri könnunarfyrirtækisins Maskínu, en hún hefur kannað hug þjóðarinnar til ólíklegustu mála í áratugi. Þau Kristján ætla meðal annars að fjalla um það hvernig nútímamiðlun hrærir upp viðurkenndum viðhorfsrannsóknum.

Heilbrigðisráðherra mætir næstur til leiks en Willum Þór Þórsson heilbrigðisráðherra ætlar að ræða um sóttkví og smitgát, bólusetningar og frelsi fólks til að afþakka þær fyrir sig og sína.

Bára Huld Beck, blaðakona á Kjarnanum, kemur ásamt Bryndísi Haraldsdóttur og Andrési Inga Jónssyni alþingismönnum. Þau ætla að skiptast á skoðunum um mál vikunnar; MeToo byltinguna og flótta forkólfa úr viðskiptalífinu.

Undir lok þáttar mætir Karl Th. Birgisson blaðamaður en þeir Kristján ræða líkurnar á vopnuðum átökum í Bandaríkjunum og hugsanleg afskipti hersins af forsetaskiptum sem voru yfirvofandi fyrir ári síðan. Æstur múgur réðst inn í þinghúsið í Washington þann 6. janúar í fyrra og kom öllu í uppnám. En hvers konar atburður var þetta og hvaða merkingu hefur hann?

Hlusta má á þáttinn í spilaranum hér að neðan.