Neitar að hafa snert brjóst eða kynfæri á óviðeigandi hátt

Þetta kom fram við aðalmeðferð í máli héraðssaskóknara gegn Jóhannesi Tryggva í Héraðsdómi Reykjaness í morgun. Jóhannes, sem dæmdur var í sex ára fangelsi fyrir að nauðga fjórum konum á meðferðarstofu sinni í fyrra, sætir ákæru fyrir að hafa nauðgað fimmtu konunni.

Jóhannes Tryggvi starfaði sem svonefndur „meðhöndlari“ og gaf sig út fyrir að geta linað þjáningar fólks með bak- og stoðkerfisvandamál. Hann var sakfelldur fyrir að nauðga fjórum konum á meðferðarstofu sinni á árunum 2009 til 2015 í janúar.

Í fimma nauðgunarmálinu er Jóhannesi Tryggva gefið að sök að hafa nauðgað konu með því að hafa við hana önnur kynferðismök en samræði án samþykkis hennar og misnotað traust hennar í tvígang í janúar árið 2012.

Man lítið eftir samskiptunum

Jóhannes mætti ekki í dómssal í morgun. Steinbergur Finnbogason, verjandi hans, upplýsti fjölskipaðan héraðsdóm um að Jóhannes væri í sóttkví og þyrfti því að bera vitni í gegnum fjarfundabúnað.

Dagmar Ösp Vésteinsdóttir, saksóknari í málinu, byrjaði á því að spyrja Jóhannes út í menntun sína. Jóhannes svaraði að hann ætlaði ekkert að tjá sig um sakargiftir utan þess sem fram hefði komið hjá lögreglu. Steinbergur verjandi sagði Jóhannes einfaldlega staðfesta allt sem komið hefði fram í máli hans í skýrslutöku hjá lögreglu.

Ingi Tryggvason héraðsdómari tók við og spurði Jóhannes út í sakargiftirnar. Jóhannes sagðist ekki hafa komið á óviðeigandi hátt við kynfæri eða brjóst konunnar. Hann sagðist kannast við ungu konuna þar sem hann hefði þekkt móður hennar.

„Ég man ekkert eftir neinu meira varðandi þessa stúlku,“ sagði Jóhannes. Saksóknari spurði þá Jóhannes út í starfshætti hans en Jóhannes ítrekaði svar sitt um að ætla ekki að tjá sig frekar.

„Þetta er bara orðið gott hjá mér.“

Sagðist ekki hafa farið inn í leggöng konunnar

Steinbergur verjandi hans spurði hann út í lögregluskýrsluna. Jóhannes staðfesti fyrri neitun að hafa sett fingur í leggöng konunnar eða að hafa nuddað brjóst hennar eða kynfæri með óviðeigandi eða kynferðislegum hætti. Hann sagðist standa við allt sem fram kæmi í skýrslunni.

Saksóknari spurði Jóhannes út í fyrri ummæli að hann færi inn í leggöng kvenna til að hjálpa þeim. Jóhannes sagðist ekki hafa gert það við þessa konu. Þá neitaði hann að svara fleiri spurningum og sagðist einfaldlega standa við lögregluskýrsluna. Lauk þar með skýrslutöku yfir Jóhannesi.

Saksóknari tjáði dómara að Steinbergur, verjandi Jóhannesar, hefði óskað eftir tveimur vitnum til viðbótar í málinu. Annað byggi í Bandaríkjunum en lögregla hefði ekki náð í vitnið, sem virtist vera lítið mál að mati verjandans. Hitt vitnið væri hins vegar ekki laust til að gefa skýrslu í dag eða á morgun. Ingi dómari sagðist ætla að hringja í vitnið og reyna að leysa málið, mögulega með aðstoð fjarfundabúnaðar.

Brotaþoli taldi ekki ástæðu til að loka þinghaldi

Konan sem kærði brotin fór ekki fram á að þinghald í málinu yrði lokað til þess að hlífa hagsmunum hennar. Það gerði Jóhannes Tryggvi hins vegar. Vísaði hann til þess að opin þinghöld myndu leiða til frekari umfjöllunar fjölmiðla sem myndi reynast honum og fjölskyldu hans þungbær. Þar sem hann vildi getað kallað brotaþola úr fyrra dómsmálinu sem vitni gætu nöfn þeirra verið gerð opinber yrði þinghaldið opið.

Dómari við Héraðsdóm Reykjaness hafnaði kröfu Jóhannesar Tryggva með þeim orðum að ekkert hafi komið fram sem yrði til þess að víkja skyldi frá þeirri meginreglu að þinghald væri opið. Þau rök sem Jóhannes Tryggvi hefði lagt fram fyrir kröfunni gætu ekki ein og sér orðið til þess að fallist yrði á hana.

Aðalmeðferðin stendur fram eftir degi og verður framhaldið á morgun þegar áætlað er að málflutningur fari fram. Næst verður tekin skýrsla af brotaþola. 

Uppfært klukkan 10:38

Héraðsdómari hefur ákveðið að fjölmiðlum sé óheimilt að birta upplýsingar úr öðrum skýrslugjöfum þar til skýrslugjöfum er lokið.