Axel Nikulásson látinn

Karfan.is greinir frá. Þar segir að Axel hafi látist eftir baráttu við veikindi. Axel var helst þekktur fyrir þátttöku sína í íslenskum körfubolta.

„Axel spilaði með Keflavík lungan af ferli sínum og varð meistari með þeim Keflvíkingum þegar þeir tóku sinn fyrsta titil árið 1989. Þar áður hafði hann dvalið vestra í Bandaríkjunum við nám í háskóla. Árið eftir titilinn með Keflavík fór Axel svo til KR og titilinn stóri fylgdi honum þangað árið 1990. Axel tók svo að sér þjálfun seinna meir hjá KR í úrvalsdeildinni og svo tók hann við því fræga 1976 árgangs landsliði sem gerði góða hluti undir hans stjórn. Axel spilaði 63 landsleiki á sínum ferli fyrir íslands hönd,“ segir á Karfan.is

Axel var starfsmaður utanríkisráðuneytisins og var hann meðal annars einn þeirra sem kallaður var til af Öryggis- og samvinnustofnun Evrópu til að meta umsvif rússneska hersins á Krímskaga árið 2014, en þá var hann starfsmaður íslenska sendiráðsins í London.