Bjargaði konu í blindbyl í gær og stráknum í sprungunni í dag

Það var á öðrum tímanum í dag sem boð bárust viðbragðsaðilum. Slysið varð rétt við Hakið, þjónustumiðstöðin á Þingvöllum, en nokkuð var um ferðamenn á svæðinu jafnvel þótt Mosfellsheiðin hefði verið lokuð þangað til upp úr klukkan eitt.

„Ég var að moka planið hjá Hakinu. Svo kemur bara einhver kona hlaupandi að mér og gargar að það hafi orðið eitthvað slys,“ segir Hreinn Heiðar í samtali við Vísi. Hann segist ekki hafa áttað sig fyrst á því hvað hefði gerst en um leið og hann sá vettvanginn þekkti hann sprunguna.

Rætt var við Hrein Heiðar í kvöldfréttum Stöðvar 2 í kvöld. Sjá má viðtalið í fullri lengd neðst í fréttinni.

Festi sig í gröfuna og lét sig síga niður

„Ég náði í gröfuna, setti festur í hana og lét mig síga niður,“ segir Hreinn Hreiðar eins og ekkert sé eðlilegra. Ekki ónýtt að hafa vanan björgunarsveitarmann á svæðinu en Hreinn Hreiðar hefur verið virkur í starfi björgunarsveita frá því á unglingsaldri.

Sjálfur var hann með keðju og félagi hans með spotta. Þeir hafi tengt allt saman til að geta græjað sig.

Hreinn hafði reynt að ná sambandi við strákinn en ekki náð sambandi við hann. Þegar hann var búinn að láta sig síga um hálfa leið niður heyrðist í þeim litla.

„Hann var bara hræddur greyið,“ segir Hreinn sem kom sér fyrir hjá þeim unga. „Hann var svo skelkaður. Þegar ég hafði róað hann þá gat ég skoðað hvort hann væri slasaður.“

Beið með stráknum eftir frekari aðstoð

Þrátt fyrir að sprungan væri líklega sjö til átta metra djúp virtist strákurinn hafa sloppið vel. Munaði þar miklu að hann hafði lent á nokkrum mjúkum snjóstöllum á leiðinni.

Hreinn segist hafa metið stöðuna þannig að halda kyrru fyrir með strákunum á meðan slökkvilið og björgunaraðilar kæmu á svæðið. Þá var lína látin síga niður og drengurinn kominn aftur í faðm fjölskyldunnar.

Um var að ræða fjögurra manna fjölskyldu frá Norðurlöndunum að sögn Hreins. Þegar Vísir náði tali af Hreini um fjögurleytið var hann kominn aftur í vinnuna, byrjaður að moka og átti von á því að vera áfram á svæðinu fram eftir degi.

„Það er bara að fylla gröfuna af olíu og halda áfram,“ segir Hreinn en dregur svo aðeins úr. Ekki sé um hefðbundinn dag að ræða, og þó. Það kemur nefnilega upp úr krafsinu að Hreinn er meðlimur í björgunarsveitinni Ingunni á Laugarvatni, sem sinnti verkefni í fyrrinótt þar sem konu var bjargað þar sem hún hafði villst af leið á Lyngdalsheiði um miðja nótt.

„Ég var reyndar fyrstur á vettvang þar líka,“ segir Hreinn Hreiðar sem var á leiðinni í vinnuna á sjötta tímanum þann morgunin. Þar var á ferðinni námshópur úr Háskóla Íslands sem var í för með kennara í þeim tilgangi að gista í snjóhúsi. Konunni varð svo kalt um nóttina að hún ætlaði að hörfa í bíl sinn í um kílómetra fjarlægð en villtist af leið.

„Já, það er búið að vera nóg að gera,“ viðurkennir Hreinn Heiðar að lokum.

Horfa má á viðtalið við Hrein Heiðar í fullri lengd í spilaranum hér fyrir neðan. 

Fréttin hefur verið uppfærð.