Bolton fékk skell í fyrsta byrjunarliðsleik Jóns Daða

Þetta var fyrsti byrjunarliðsleikur Jóns Daða síðan hann gekk í raði Bolton í síðasta mánuði, en leikurinn fór ekki vel af stað fyrir hans menn.

Heimamenn í Burton tóku forystuna strax á 11. mínútu með marki frá Joe Powell. Þremur mínútum síðar var staðan orðin 2-0 eftir að John Brayford kom boltanum í netið og Brayford var svo aftur á ferðinni á 18. mínútu þegar hann skoraði þriðja mark Burton.

Gestirnir í Bolton náðu að koma inn einu sárabótamarki í uppbótartíma síðari hálfleiks, en þá var það orðið of seint. Lokatölur urðu því 3-1, Burton Albion í vil.

Bolton situr í tíunda sæti deildarinnar með 45 stig eftir 32 leiki, tveimur stigum og tveimur sætum fyrir ofan Burton.