„Lagið var nánast tilbúið á klukkutíma“

Lagið varð til af tilviljun. „Ég mætti í stúdíó-ið hugmyndalaus og fór að leika mér að því að gera hljóð og áferðir. Tók upp röddina mína og forritaði hljóðfæri úr henni til að geta notað seinna. Hafði gefist upp á að reyna að semja þann dag. Þegar ég fór að prófa hljóðfærið þá kom þessi hljómagangur til mín og eitt leiddi að öðru. Lagið var nánast tilbúið á klukkutíma.“

Þetta lag, ásamt allri plötunni, varð til í einrúmi yfir sólríkt sumar í myrkum kjallara árið 2019. Platan er tilraun til að skilja þáverandi ástand og tilfinningar. Ekki fokkí mér er yfirlýsing þess að hafa fengið nóg, nóg af innra ástandi og hvernig maður var búinn að leysa úr því.

Hljóðheimurinn er brenglaður, grunnurinn er búinn til úr röddum sem eru mótaðar í einhverskonar orgel. Yfir þeim svífa beittir synthar og undir hamast hráar trommur. Grófur syntha bassi límir þetta svo saman. Textinn, sem varð til að mestu á þessum klukkutíma er skrifaður í flæði og er einfaldur og hrár samkvæmt því. „Stælarnir sem er talað um í textanum byrjuðu sem vísun í ákveðna manneskju en urðu síðan meira merking fyrir flækjustig lífsins á þessum tíma.“

Ásamt laginu kemur tónlistarmyndband gert af Tómasi Sturlusyni og Muna Jakobssyni. Myndabandið nýtir hráleikan og myrkrið í laginu til mála mynd af því innra ástandi sem lagið tekst á við.