Velta fyrir sér hvort Man United þurfi að vera djarfara í ráðningu á nýjum þjálfara

Frá því að Sir Alex Ferguson hætti sem þjálfari Manchester United hafa alls sjö menn tekið að sér að þjálfa liðið, þrír af þeim hafa gegnt stöðu bráðabirgðastjóra á meðan hinir fjórir voru ráðnir til lengri tíma. 

Þó félagið hafi þurft að borga þeim fúlgur fjár er þjálfurunum fjórum var sagt upp störfum þá þurfti Manchester United ekki að hafa mikið fyrir því að sækja þá.

David Moyes var fyrstur, hann var að renna út á samning hjá Everton og því auðvelt að fá hann yfir lækinn. Louis Van Gaal var annar en hann var einnig að renna út á samning hjá hollenska knattspyrnusambandinu. 

José Mourinho var þriðji en hann var atvinnulaus eftir að hafa yfirgefið Chelsea og Ole Gunnar Solskjær var samningsbundinn Molde í Noregi sem ákvað að standa ekki í vegi fyrir draumastarfi Norðmannsins.

Þá var Rangnick nýbúinn að ganga til liðs við við Lokomotiv Moskvu en tókst að fá sig lausan og semja við Manchester United. 

Daniel Taylor og Adam Crafton – blaðamenn hjá The Athletic – velta fyrir sér hvort Man Utd þurfi að vera djarfara í ráðningum á þjálfara. Roy Keane – fyrrverandi fyrirliði liðsins – tekur undir þetta en hann ræddi við Gary Neville og Jaime Carragher á dögunum þar sem þjálfarastaða Manchester United kom upp. 

Keane velti fyrir sér af hverju Man Utd hefði aldrei borgað almennilega fjárhæð fyrir þjálfara í stað þess að vera alltaf að borga þá út.

„Ef þú virkilega vilt þjálfara þá er þetta eins og með leikmenn, þú þarft að fara og sækja hann. Ef hann er rétti þjálfarinn fyrir Manchester United þá ferðu og sækir hann. Borgar það sem til þarf, þú ert að borga morðfjár fyrir leikmenn á sama tíma.“

Vill manninn sem stýrir mótherja Man United í Meistaradeildinni

„Hann hefur gert frábæra hluti. Stór karakter með stóran persónuleika. Farið og sækið Diego Simeone,“ sagði Keane um manninn sem hann vill sjá taka við Man United.

Taylor og Crafton eru ekki svo vissir að Simeone myndi njóta sín á Englandi en hann hefur til að mynda sjálfur sagt að tungumálaörðugleikar gætu gert honum erfitt fyrir. 

Hluti af árangri Simeone með Atlético Madríd hefur verið byggður á sambandi hans við leikmenn sína, leikmenn sem tala sama tungumál og hann.

Mauricio Pochettino rétti maðurinn í starfið?

Keane telur að Man United hefði átt að reyna við Pochettino áður en Solskjær var ráðinn árið 2019. Er Solskjær var rekinn var Pochettino tekinn við París Saint-Germain en hann hefur samt verið orðaður við Man United statt og stöðugt síðan.

Talið er að enska félagið hafi ekki viljað borga 15 milljónir punda til að losa Pochettino undan samningi hjá PSG er Rangnick var ráðinn. Verðið mun eflaust vera það sama í sumar nema PSG láti Pochettino fara. Það sem flækir málin er að Real Madríd horfir einnig til Pochettino sem arftaka Carlo Ancelotti.

Erik ten Hag, þjálfari Ajax, hefur einnig verið orðaður við þjálfarastöðuna á Old Trafford. Hvort sú ráðning væri djarfari eða sniðugri heldur en Pochettino eða Simeone veit enginn en sem stendur hefur enginn hollenskur þjálfari náð framúrskarandi árangri í ensku úrvalsdeildinni.