Þakklátur sundkónginum eftir góðan hring í bleytunni

Margir kylfingar náðu þó að ljúka fyrsta hringnum þrátt fyrir bleytuna og þrumuveður. Englendingurinn Tommy Fleetwood og Bandaríkjamaðurinn Tom Hoge eru efstir þeirra, á -6 höggum.

Fjórir kylfingar koma þar á eftir, á fimm höggum undir pari, og þar á meðal er hinn þrítugi Keith Mitchell sem hefur verið á mikilli uppleið eftir að hafa verið kominn niður í 249. sæti á heimslistanum fyrir ári síðan.

Mitchell segir það hafa breytt öllu hjá sér að ræða við sigursælasta ólympíufara allra tíma, sundmanninn Michael Phelps, sem vann 23 gullverðlaun á Ólympíuleikum og alls 28 verðlaun á leikunum.

Phelps fékk hann til að endurræsa

„Ég var ekki að gefa allt mitt í þetta. Hann hjálpaði mér úr slæmri stöðu og fékk mig til að ýta á endurræsingartakkann fyrir ári síðan. Það kom þessu öllu af stað, að fá rétt hugarfar, þjálfun, og hætta að vera eitthvað að vorkenna sjálfum sér,“ sagði Mitchell.

„Við borðuðum saman í Phoenix og hann var að segja mér mjög áhugaverða hluti sem eiga við allar íþróttir. Ég gleymi því aldrei. Þetta hafði mikil áhrif á mig. Það var ekki þetta týpíska úr golfinu um að slá bara eitt högg í einu og vera þolinmóður. Það var meira um hvernig maður hagar sér og einbeitir sér á vellinum, líkt og maður myndi gera á sundmóti,“ sagði Mitchell en aðstæður í gær minntu að vissu leyti á sundmót.

Efsti maður heimslistans, Spánverjinn Jon Rahm, lék á 69 höggum eða þremur höggum undir pari.