Sex kylfingar létust og tveir illa slasaðir eftir að liðsrútan lenti í árekstri

Liðsmenn University of the Southwest voru á leiðinni heim frá golfmóti sem fór fram í Midland í Texas. Restinni af mótinu var aflýst en þar tóku ellefu skólar þátt en bæði karla og konur tóku þátt í mótinu.

Nú er komið í ljós að í pallbíllnum sem keyrði framan á rútuna var þrettán ára drengur við stýrið með faðir sinn við hliðina.

Í fréttum bandaríska fjölmiðla kemur fram að pallbíllinn hafi rásað inn á vitlausan vegarhelming og bílarnir tveir skollið saman á miklum hraða. Eldur kviknaði síðan í báðum bílum eftir áreksturinn.

Feðgarnir létust báðir en einnig sjö manns í rútunni. Þjálfari golfliðsins og sex liðsmenn létust og þá eru tveir kylfingar til viðbótar lífshættulega slasaðir.

Þau sem létust voru Tyler James, 26 ára þjálfari liðsins sem og kylfingarnir Mauricio Sanchez (19 ára), Travis Garcia (19 ára) Jackson Zinn (22 ára), Karisa Raines (21 árs), Laci Stone (18 ára) og Tiago Sousa (18 ára).

Hinn 19 ára gamli Dayton Price og hin 20 ára Hayden Underhill voru flutt lífshættulega slösuð á sjúkrahús en þau eru bæði frá Kanada.

Lög í Texas leyfa ungmennum í fylkinu að hefja æfingaakstur undir eftirliti fullorðins ökumanns þegar þau ná fimmtán ára aldri.