Fuglahræður við Kópasker breyttust í barnahræður sem sjóða börn í potti

Kristján Már Unnarsson skrifar 24. mars 2022 22:55

Sigurlína Jóhanna Jóhannesdóttir, bóndi á Snartarstöðum 2 við Kópasker. Fyrir aftan má sjá Grýlu og Leppalúða með barn í pottinum. Einar Árnason

Skrautlegar fuglahræður sem bóndi við Kópasker hóf að koma upp á túni við bæ sinn eru löngu hættar að hafa það hlutverk að fæla burt fugla, en fanga þess í stað athygli ferðamanna og einkum barna.

Í fréttum Stöðvar 2 kom fram að húsfreyjan á Snartarstöðum 2, Sigurlína Jóhannesdóttir, ætti hugmyndina en eiginmaður hennar og sonur hjálpuðu við smíðina.

Sigurlína sýnir pottinn sem Grýla er að hræra í. Leppalúði með blóðuga öxina við hliðina.Einar Árnason

Í þættinum Um land allt sagðist hún hafa byrjað að koma hræðunum upp fyrir um þrjátíu árum, en ekki bara til að hræða burt fugla. Hún vildi um leið vekja athygli ferðafólks á Kópaskeri og sérstaklega ná til barna þegar þau litu út um bílgluggann á sumarferðalagi um landið.

„Þau myndu muna eftir því í næsta landafræðitíma um haustið þegar þau mættu í skólann hvar Kópasker væri. Því þar voru allar hræðurnar við veginn,“ sagði Sigurlína.

Þær eru yfir þrjátíu talsins og hver með sína sögu. Þarna er drottning með kórónu að húkka far og önnur, hún Guðfinna, situr með pott í fanginu á gamalli sláttuvél.

Þessi er drottning með kórónu á höfði og ferðatösku sér við hlið að húkka sér far.Einar Árnason

„Margar þeirra eru að sjóða mat. Þetta er bara eins og við erum, konurnar. Við erum endalaust að sjóða. Sérðu eins og þarna: Þessi, hún er bara að sjóða heilt barn.“

Já, hér er komin sjálf Grýla og með barn í pottinum, og með Leppalúða við hliðina, sem heldur á blóðugri exi. Við spyrjum hvort þetta sé til að hræða börnin:

„Nei, bara til að sýna þeim hvað getur gerst ef þau fara ekki eftir reglum, kannski. Maður veit aldrei.“

Sigurlína Jóhannesdóttir og Grýla með barnið í pottinum.Einar Árnason

Og þær hafa sannarlega átt þátt í að auglýsa Kópasker.

„Þær hafa komið í ferðabæklingum erlendis, hef ég frétt. Þannig að þetta vekur einhverja athygli,“ segir Sigurlína, bóndi og ökukennari á Snartarstöðum.

Þátturinn um Kópasker verður endursýndur á Stöð 2 á sunnudag klukkan 14.05. Einnig má nálgast þáttinn á streymisveitunni Stöð 2+.

Hér má sjá frétt Stöðvar 2:

Um land allt Norðurþing Ferðamennska á Íslandi Landbúnaður

Tengdar fréttir

Brýn nauðsyn að Kópasker byggist upp sem samfélag en ekki verbúðir

„Já, nú er uppgangur. Fiskeldisstöðvar að rísa. Það er bara frábært,“ segir Björn Guðmundur Björnsson, kaupmaður á Kópaskeri. „Já, þetta er afar jákvætt. Þetta er afar mikilvæg stoð fyrir þetta þorp hérna. Þetta er bara hrein viðbót,“ segir Björn Víkingur Björnsson, framkvæmdastjóri Fjallalambs á Kópaskeri.

21. mars 2022 12:20

Segir það illa nýtta fjárfestingu að hafa Dettifossveg lokaðan

Hinn nýi Dettifossvegur nýtist atvinnulífi á Norðausturlandi ekki sem skyldi þar sem hann er ekki mokaður á veturna. Fulltrúi fiskeldisfyrirtækis í Öxarfirði, sem þarf að koma afurðum í skip á Austfjörðum í hverri viku, segir það illa nýtta fjárfestingu að hafa veginn lokaðan.

21. mars 2022 22:22

Galdrapresturinn á Skinnastað hlaut viðurnefnið greipaglennir

„Hann var kallaður Jón greipaglennir af því að hann glennti út fingur sína, er sagt vera, þegar hann blessaði yfir söfnuðinn,“ segir sóknarpresturinn og prófasturinn Jón Ármann Gíslason á Skinnastað í Öxarfirði um forvera sinn, séra Jón Einarsson, sem uppi var á árunum 1655 til 1737.

20. mars 2022 07:37

Sænskar konur uppgötvuðu Öxarfjörð og fóru svo hvergi

Tvær sænskar konur, sem stofnað hafa heimili í Öxarfirði með íslenskum eiginmönnum, eru meðal viðmælenda í þættinum Um land allt á Stöð 2. Báðar eiga sinn þátt í því að börnum hefur farið fjölgandi í sveitinni.

14. mars 2022 12:13