„Nú er kominn tími til að hafa aftur gaman“

Norðanmenn þekkja hátíðina afar vel enda myndast mikil stemning þegar bæjarbúar flykkjast í miðbæinn til að fylgjast með tilþrifum snjóbrettakappanna. Gauti Þeyr Másson sem er betur þekktur sem Emmsjé Gauti segir ekki hafi reynst unt að halda hátíðina í mörg ár meðal annars vegna faraldursins og því sé eftirvæntingin og spennan gríðarleg. Fréttastofa ræddi við Gauta í hádegisfréttum Bylgjunnar.

„Það eru allir þyrstir eftir langa pásu og nú er kominn tími til að hafa gaman aftur. Maður finnur að það hefur aldrei gengið jafnvel að selja miða þannig að við erum að búast við miklu partíi.“

Í kvöld og annað kvöld verður sérleg tónlistarveisla í Sjallanum á Akureyri en tónlistarfólk á borð við Aron Can, Birni og Bríet mun stíga á svið. Gauti segir að það sé næstum uppselt á tónleikana en að snjóbrettahluti hátíðarinnar sé alveg ókeypis.

Sjá nánar: Árshátíð snjóbrettaiðkenda

„Við „störtum“ hátíðinni „officially“ með brunkeppni og grillveislu þar sem öllum er boðið. Síðan á morgun, eins og Akureyringar og aðdáendur hátíðarinnar eru búnir að taka eftir, þá verðum við ekki með gámastæðurnar í bænum eins og við höfum vanalega gert því það var bara svo lítill fyrirvari þannig að við færðum stóru pallana upp í fjall og verðum þar klukkan eitt og síðan verðum við með innanbæjarsnjóbrettakeppni þar sem menn verða að renna sér á handriðum, hoppa niður stiga og gera alls konar kúnstir. Þetta verður í Skátagilinu á morgun og byrjar klukkan 20.00.“

„Hetjurnar að norðan“ breyttu leiknum

Gauti var spurður hvort snjóbrettasenan sé enn jafn sterk og hún var en bræðurnir Eiríkur og Halldór Helgasynir lyftu íþróttinni á hærra plan á sínum tíma.

„Það sem strákarnir gerðu, hetjurnar að norðan, settu náttúrulega bara gott fordæmi fyrir því að það væri hægt að gera þetta af alvöru því áður en þeir gera þetta þá var enginn atvinnumaður frá Íslandi,“ sagði Gauti sem bætti við að það væri hans tilfinning að íþróttin væri að styrkjast og festast í sessi.

Hættir ef íþróttin verður of formleg

Aðspurður segir Gauti þó að íþróttin megi aldrei verða of formleg heldur sé það aðlaðandi hvað hún sé hrá og óhefluð.

„Það fallega við snjóbretti er að þetta er alltaf smá „sketchy“. Um leið og þetta verður fullkomlega skipulagt allt saman þá verðum við bara að hætta,“ sagði Gauti og skellti upp úr.

Dagskráin er eftirfarandi:

Föstudagur 1. apríl.

18.30 Mæting við skálann í Hlíðarfjalli. Red bull Extreme downhill fyrir alla.

19.00 Sprettur-inn og Red Bull bjóða öllum í grillpartý í Hlíðarfjalli.

23.00 Tónleikar í Sjallanum

Laugardagur 2. apríl

13.00-16.00 Red Bull BigAir í Hlíðarfjalli og Junior Big Air í Hlíðarfjalli. Öllum velkomið að taka þátt.

20.00-21.30 Red Bull Jib mót niðri í bæ á Akureyri

23.00 Tónleikar í Sjallanum