DeChambeau hunsar ráðleggingar lækna og spilar á Masters

Ingvi Þór Sæmundsson skrifar 5. apríl 2022 17:00

Bryson DeChambeau komst ekki í gegnum niðurskurðinn á Valero Texas Open um helgina. getty/Stacy Revere

Bandaríski kylfingurinn Bryson DeChambeau ætlar að spila á Masters-mótinu í vikunni þvert á ráðleggingar lækna hans. Hann hefur verið meiddur undanfarnar vikur og er hundrað prósent klár í slaginn.

Masters, fyrsta risamót ársins, hefst á morgun. Venju samkvæmt fer mótið fram á Augusta National vellinum í Georgíu.

DeChambeau verður meðal keppenda þrátt fyrir að hafa glímt við meiðsli að undanförnu. Hann braut bein í höndinni og meiddist á mjöðm þegar hann rann á marmaragólfi þegar hann var að spila borðtennis.

DeChambeau harkaði af sér og hefur spilað á mótum undanfarnar tvær helgar. Og hann verður með á Masters.

„Þetta er bara einu sinni á ári og ég verð að láta þetta reyna,“ sagði DeChambeau. „Venjulega tekur það fjóra mánuði fyrir bein að gróa en ég er kominn til baka eftir tvo mánuði. Ég er ánægður með það. Ég er sennilega áttatíu prósent klár núna. Ég get samt ekki æft af fullum krafti og lengi og þarf bara að meta hlutina.“

Læknar DeChambeaus eru ekkert sérstaklega hrifnir af því að hann taki þátt á Masters en freistingin var of mikil fyrir Bandaríkjamanninn hrausta.

„Þeir mæltu með því að ég tæki mér góða hvíld en sögðu að ef ég gæti slegið bolta og ekki fundið neitt athugavert gæti ég íhugað það,“ sagði DeChambeau.

„Þeir sögðu að ég ætti að leyfa þessu að gróa og þjálfarinn minn [Chris Como] var eiginlega sammála, jafnvel þótt hann vilji að ég spili. Hann ber hag minn fyrir brjósti.“

DeChambeau hefur unnið einn risatitil á ferlinum, Opna bandaríska meistaramótið 2020. Besti árangur hans á Masters er 21. sæti 2016.

Sýnt verður frá öllum keppnisdögunum á Masters á Stöð 2 Golf. Fyrsta beina útsendingin hefst klukkan 19:00 á morgun.

Golf Masters-mótið