Á­ætlað verð­mæti þýfisins 43 milljónir króna

Í dómsorðum segir að fresta skuli fullnustu refsingarinnar og hún niður falla að liðnum fimm árum liðnum, haldi maðurinn almennt skilorð.

Fjármagna neyslu

Í dómnum kemur fram að sakaferill mannsins nái aftur til ársins 2009 og að hann eigi nokkra dóma á bakinu. Hann sé nú sakfelldur fyrir 28 þjófnaðarbrot á tímabilinu september 2021 til mars 2022, auk stuldar á bíl og brota gegn umferðarlögum, lyfjalögum og fíkniefnalöggjöf. Segir að maðurinn hafi átt við fíknivanda að stríða og hafið brotahrinuna haustið 2021 til að fjármagna neysluna. Hann hafi hins vegar þá verið á beinu brautinni frá árinu 2014.

Í ákæru má sjá að maðurinn hafi ítrekað brotist inn og stolið verðmætum verkfærum í nýbyggingum og á vinnusvæðum, sem og brotist inn í íþróttahús og einbýlishús.

Sérstaklega stórfelld þjófnaðarbrot

Við ákvörðun refsingar er litið til þess að þjófnaðarbrotin hafi verið sérstaklega stórfelld í skilningi laga, bæði vegna hins mikla fjölda brota heldur einnig vegna verðmætis þess sem stolið var. Stærstur hluti þýfisins hafi þó komist aftur til skila.

Þó segir að maðurinn hafi gengist greiðlega við öllum brotum, játað sök fyrir dómi og samþykkt bótakröfu upp á rúma hálfa milljón króna í málinu. Hafi hann jafnframt nú virst hafa náð einhverjum tökum á lífi sínu, sæki reglulega AA-fundi og stefni að því að komast aftur út á vinnumarkað. Þá eigi hann ungt barn úr fyrra sambandi og því telji dómari rétt að fresta fullnustu refsingarinnar líkt og áður sagði.

Maðurinn er jafnframt sviptur ökurétti í átján mánuði og þá eru gerð upptæk tæplega 100 grömm af amfetamíni og 110 stykki af læknislyflum. Ennfremur segir að maðurinn skuli greiða rúma milljón króna í sakarkostnað.