Ólafía Þórunn um endur­komuna: „Höfuðið hélt að ég gæti meira en líkaminn vildi gera“

Ríkharð Óskar Guðnason ræddi við Ólafíu Þórunni um endurkomuna en viðtalið í heild sinni má finna í spilaranum neðst í fréttinni.

„Á fyrsta mótinu var mjög gaman að sjá allt fólkið aftur og komast í þennan gír en ég fann að höfuðið hélt að ég gæti meira en líkaminn vildi gera. Það vantaði fínu hreyfingarnar og tilfinninguna í stutta spilinu,“ hélt Ólafía Þórunn áfram.

Breytt æfingaplan

„Það hefur gengið rosalega vel. Við búum í Þýskalandi, við hliðina á foreldrum hans Thomas  (Bojanowski, barnsföður Ólafíu Þórunnar) þannig að ég skutla honum bara yfir klukkan átta á morgnana og fer svo út á völl og æfi mig.“

„Þetta eru meiri „quality“ æfingar núna þar sem ég hef ekki allan tímann í heiminum. Ég verð virkilega að nýta tímann sem ég fæ.“

Um sumarið

„Ég er alltaf að vinna að því (að ná fyrri styrk). Þetta kemur skref fyrir skref, ég sé alltaf bætingar. Það eina sem vantar upp á er högglengdin. Kannski mögulega þessi tilfinning að vera í golfmótum. Er bara búinn að taka þátt í tveimur mótum og það vantar smá skerpu, að halda einbeitingu í þessa fjóra klukkutíma, höndla pressu og þannig.“

„Finn það og er búin að vera vinna mikið í því síðustu vikur en þetta kemur allt.“

„Ég var að komast inn í mót í Tékklandi sem fer fram undir lok júní. Ég elska Tékklandsvöllinn og fýla Tékkland líka svo ég er rosalega spennt. Mamma og pabbi ætla að koma og passa á meðan ég keppi og Tómas ætlar að vera á pokanum (kylfusveinn) svo þetta er virkilega fjölskyldusport núna.“

„Það er planið að taka þátt á Íslandsmótinu í höggleik. Ég er búin að finna mér íbúð í Vestmannaeyjum þannig að ég kem með allt bandið,“ sagði Ólafía Þórunn að endingu.