Rör fór aftur í sundur við Fjarðar­sels­virkjun

Í tilkynningu á vef lögreglunnar segir að smávægilegar skemmdir hafi orðið á veginum að Fjarðarseli en að greiðlega hafi gengið að skrúfa fyrir vatnsflauminn. Aðrennslisrörið hafi þegar verið lagað og vegurinn opnaður á ný.

Þá segir að stutt sé síðan álíka atvik hafi orðið og að eigandi Fjarðarselsvirkjunar skoði nú aðstæður með það að markmiði að koma í veg fyrir að atvik sem þetta endurtaki sig.

Í júní þurftu Seyðisfirðingar að láta sér heitt vatn nægja um stund eftir að kaldavatnslögn við Fjarðaselsvirkjun gaf sig.