Henderson ein á toppnum á Evian meistaramótinu

Hjörtur Leó Guðjónsson skrifar 22. júlí 2022 16:01

Brooke M. Henderson trónir á toppnum á Evian meistaramótinu í golfi þegar mótið er hálfnað. Stuart Franklin/Getty Images

Kanadíska golfkonan Brooke M. Henderson er með þriggja högga forystu á Evian meistaramótinu í golfi sem nú fer fram í Frakklandi.

Þetta er annar dagur risamótsins og nú hafa nánast allir kylfingar lokið sér af í dag. Henderson lék hringinn í dag á 64 höggum og er nú á samtals 14 höggum undir pari, ein í efsta sæti. Henderson lék frábærlega í dag og endaði hringinn á þrem fuglum í röð.

Næst á eftir henni kemur bandaríski kylfingurinn Nelly Korda á 11 höggum undir pari vallarins, en hún og Henderson voru jafnar í öðru sæti eftir fyrsta hringinn í gær.

Ayaka Furue var í forystu fyrir hring dagsins, en hún lék hringinn í gær á 63 höggum, átta höggum undir pari. Hún náði hins vegar ekki að fylgja þeirri frammistöðu eftir og kláraði hringinn í dag á 72 höggum, einu höggi yfir pari. Furue situr nú í 11. sæti mótsins ásamt þrem öðrum kylfingum.

Þá verður skorið niður í dag og búist er við því að þeir kylfingar sem verða á pari eða betra eftir daginn komist í gegn. Eins og staðan er núna komast 74 kylfingar af 132 sem hófu leik í gegnum niðurskurðinn.

Golf