Sagður hafa verið yfir­heyrður á heimili sínu í tveimur að­skildum málum

DV hefur eftir heimildamanni í frétt sem birtist í gær að Guðjón Valdimarsson, faðir Sigríðar Bjarkar ríkislögreglustjóra, hafi verið yfirheyrður á heimili hans á sama tíma og húsleit var gerð þar í lok septembermánaðar í tengslum við hryðjuverkamálið. Þar segir jafnframt að við húsleitina hafi honum verið kynnt að hann hefði stöðu sakbornings og væri grunaður um vopnalagabrot.

„Þetta er reyndar áður en við fáum stýringuna á rannsókninni. Þetta er deginum á undan,“ segir Ólafur Þór Hauksson, héraðssaksóknari. 

Lögreglan á höfuðborgarsvæðinu hafi séð um húsleitina en hann gat þó ekki staðfest hvort yfirheyrslan hafi farið fram á heimili Guðjóns. Sama kvöld og farið var í þessa aðgerð hafi Sigríður Björk sagt sig frá málinu. Á fjórða tug óskráðra skotvopna fannst á heimili Guðjóns.

Var yfirheyrður heima árið 2018

Reynist rétt að Guðjón hafi verið yfirheyrður á heimili sínu er það ekki fyrsta sinn sem hann er yfirheyrður heima. Árið 2018 var Guðjón yfirheyrður vegna hálfsjálfvirks ólöglegs riffils sem fannst í húsleit hjá manni sem hafði keypt riffilinn af Guðjóni. Þeir deildu um hvort riffillinn hafi verið í ólöglegri mynd þegar Guðjón seldi hann.

Málið var flutt til lögreglunnar á Vesturlandi þar sem Sigríður Björk var lögreglustjóri á höfuðborgarsvæðinu á þeim tíma. Lögreglumaður af Vesturlandi, sem annaðist rannsóknina, tók skýrslu af Guðjóni á heimili hans í Hafnarfirði. Guðjón fékk stöðu vitnis í málinu.

Jón Gunnarsson dómsmálaráðherra sagði í samtali við fréttastofu fyrir helgi að það væri ekkert sem benti til að Guðjóni hafi verið hlíft af lögreglu vegna fjölskyldutengsla við ríkislögreglustjóra. 

Héraðssaksóknari segist ekki geta upplýst um stöðu Guðjóns í hryðjuverkarannsókninni.

Er Guðjón með réttarstöðu sakbornings eða réttarstöðu vitnis?

„Við höfum ekki kommenterað á stöðu einstakra aðila,“ segir Ólafur Þór. 

Lögmenn sem fréttastofa hefur rætt við vegna málsins segja afar óeðlilegt að fólk sé yfirheyrt heima hjá sér. Það sé ekki gert nema fólk sé alvarlega sært eða veikt og samkvæmt lögum um meðferð sakamála skal skýrslutaka af sakborningum og vitnum fara fram fyrir luktum dyrum.

Hefur stundað vopnaviðskipti með reiðufé

Fram kemur í frétt DV, sem hefur allt eftir heimildarmanni, að sakborningar í hryðjuverkamálinu séu fjórir. Tveir þeirra hafi átt í viðskiptum við Guðjón, hvorugur þeirra í gæsluvarðhaldi vegna málsins. Öðrum þeirra hafi Guðjón lánað hálfsjálfvirkan og ólöglegan Colt riffil. Hinn hafi aft milligöngu að því að selja Guðjóni þrívíddarprentað skotvopn og Guðjón borgað 400 þúsund í reiðufé fyrir.

Í áðurnefndu máli, sem upp kom 2018, kemur fram í dómsgögnum, sem fréttastofa hefur undir höndum, að Guðjóni hafi verið borgað fyrir riffilinn í seðlum. Hvorki hafi kvittun, reikningur né millifærsla verið til staðar fyrir viðskiptunum. Guðjón hélt því fram að hann hafi selt riffilinn fyrir 700 þúsund krónur en maðurinn sem keypti hann sagðist hafa borgað 1,5 milljón króna. Allt í seðlum.