Wagner-liði vill hæli í Noregi

Lögmaður Medvedevs segir hann hafa flúið land því hann hafi orðið vitni að stríðsglæpum í Úkraínu og hann sé tilbúinn til að ræða þá stríðsglæpi við rannsakendur og aðra. Medvedev er 26 ára gamall og er í haldi í Ósló. Þetta er talið í fyrsta sinn sem málaliði Wagner leitar hælis á Vesturlöndum, samkvæmt frétt BBC.

Rússneski miðillinn Moscow Times segir frá því að Medvedev hafi rætt við rússnesk mannréttindasamtök sem kallast Gulagu, eftir að hann flúði til Noregs. Þar hafi hann sagt frá því að rússneskir landamæraverðir hafi skotið á hann þegar hann flúði yfir landamærin.

Leiddi mann sem myrtur var með sleggju

Mannréttindasamtökin segja einnig að Medvedev hafi leitt herdeild Wagner sem Yevgeny Nuzhin, dæmdur morðingi var einnig í. Nuzhin var handsamaður af Úkraínumönnum í fyrra en var svo skipt aftur til Rússlands í fangaskiptum. Eftir það var hann myrtur af öðrum málaliðum með sleggju og birtu forsvarsmenn Wagner myndband af morðinu á internetinu.

Medvedev segir aðra málaliða sem hafi neitað að drepa Úkraínumenn eða reynt að flýja hafa verið myrta með sama hætti.

Stofnandi Gulagu sagði blaðamanni BBC að Medvedev hefði þjónað í rússneska hernum en verið dæmdur í fangelsi. Eftir það gekk hann til liðs við Wagner og var gerður að leiðtoga þar. Hann segist hafa flúið frá Úkraínu eftir að honum varð ljóst að yfirmenn Wagner ætluðu ekki að leyfa honum að hætta þegar fjögurra mánaða samningur hans rann út.

Var í felum í Rússlandi

Rússneski miðillinn Novaya Gazeta segir frá viðtali sem Medvedev fór í áður en hann flúði til Noregs en hann er sagður hafa varið tveimur mánuðum í felum í Rússlandi. Þar sagði hann að sérstök deild innan Wagner hefði séð um að taka málaliða sem þykja brjóta reglur hópsins af lífi. Það hafi bæði verið gert í laumi og opinberlega.

Lögmaður Medvedevs segir hann hafa mögulega tekið sannanir fyrir stríðsglæpum með sér til Noregs og að hann ætli sér að deila þeim upplýsingum með aðilum sem rannsaka stríðsglæpi.

Kokkurinn segir Medvedev hættulegan

Auðjöfurinn Yevgeny Prigozhin rekur Wagner Group en tengist Vladimír Pútín, forseta, nánum böndum og hefur verið kallaður „kokkur Pútíns“. Hópurinn var stofnaður árið 2015 í kjölfar upprunalegrar innrásar Rússa í Úkraínu árið 2014 og hefur verið lýst sem „skuggaher Rússlands“.

Málaliðahópurinn hefur verið virkur í Úkraínu, Mið-Austurlöndum og í Afríku en málaliðar Wagner hafa víða verið sakaðir um ýmis ódæði.

Sjá einnig: Hermenn og rússneskir málaliðar tóku hundruð af lífi í Malí

Prigozhin hefur ráðið þúsundir rússneskra fanga til að berjast í Úkraínu í skiptum fyrir frelsi.

Auðjöfurinn hefur sent út yfirlýsingu um Medvedev þar sem hann gerir lítið úr honum og segir hann vera norskan ríkisborgara. Prigozhin sakar Medvedev einnig um að hafa komið illa við fanga og segir hann vera mjög hættulegan. Lögmaður Medvedevs segir ummæli auðjöfursins vera röng.

Evrópusambandið segir Wagner Group hafa verið stofnað af Dmitry Utkin, fyrrverandi hermanni frá Rússlandi, sem er skreyttur nasista-húðflúrum. Þá er málaliðahópurinn sagður vera kallaður Wagner Group vegna þess að Richard Wagner hafi verið eitt af uppáhalds tónskáldum Adolfs Hitler.

Utkin er meðal annars sakaður um að hafa fyrirskipað pyntingu og morð á sýrlenskum liðhlaupa.

Sjá einnig: Rússneskur málaliði myndaði aðra pynta, myrða, afhöfða og brenna fanga

Úkraínumenn og aðrir hafa farið fram á að hópurinn verði skilgreindur sem hryðjuverkasamtök.