Líklega um sex hundruð fengið lyfið á síðustu tveimur vikum

Danska lyfjastofnunin greindi frá því fyrr í vikunni að níu einstaklingar hefðu sýkst af fjölónæmu bakteríunni Enterobacter hormaechei en þeir áttu það allir sameiginlegt að hafa fengið sýklalyfið Dicillin frá Sandoz. Eftir rannsókn kom í ljós að ein framleiðslulota var menguð af bakteríunni. Ekki væri hægt að útiloka að aðrar framleiðslulotur hafi mengast.

Rúna Hauksdóttir Hvannberg, forstjóri Lyfjastofnunar, segir að ákveðið hafi verið að hætta sölu lyfsins Staklox, sem er sama lyf frá sama framleiðanda, hér á landi í fyrradag vegna málsins.

„Við byrjuðum á því að setja sölustopp á lyfið frá apótekum en svo var ákveðið núna í kjölfar þess að það eru möguleg tengsl við einn einstakling hér heima, þó það sé ekki að fullu rannsakað, að þá erum við að óska eftir því að fólk skili lyfinu í apótek og fái nýtt lyf á móti,“ segir Rúna.

Til skoðunar hefur verið hversu margir hafa fengið lyfið hér á landi síðastliðnar tvær vikur.

„Það eru líklegast sex hundruð manns en við vitum þetta ekki nákvæmlega. Við erum að kalla eftir þessum upplýsingum bæði frá Sjúkratryggingum og embætti landlæknis,“ segir Rúna.

Ekki saman sem merki milli þess að taka mengað hylki og að sýkjast

Aðgerðin sé unnin í nánu samstarfi við landlækni, sóttvarnalækni og smitsjúkdómalækna Landspítala og hefur verið haft samband við umrædda einstaklinga í gegnum Heilsuveru.

Mikilvægt sé að fólk sé vakandi fyrir einkennum, þó ekki sé saman sem merki milli þess að fá mögulega mengað hylki og að sýkjast. Bakterían geti verið í meltingarvegi lengi og orðið hluti af sýklaflóru viðkomandi.

„Þetta þarf ekkert að leiða til sýkingar, það eru svipaðar bakteríur nú þegar í meltingarvegi, en þetta getur valdið sýkingu og það er bara mikilvægt að horfa til þess að þetta getur verið þvagfærasýking til dæmis,“ segir Rúna en hún segir um að gera að snúa sér til læknis hafi fólk fengið lyfið.

Þá getur bakterían smitast milli einstaklinga við mikla nánd og saur-munn smiti líkt og aðrir iðrasýklar. Þó um sé að ræða bakteríu sem er ónæm fyrir einhverjum sýklalyfjum eru meðferðarkostir í boði. Ítarlegar upplýsingar má finna á vef Landlæknaembættisins auk þess sem finna má leiðbeiningar á vef Lyfjastofnunar.

Yfirvofandi skortur á samheitalyfi en önnur sending á leiðinni

Lyfið sem fólk fær í stað Staklox heitir Dicloxacillin Bluefish en það lyf er af skornum skammti um þessar mundir og hefur Lyfjastofnun stöðvað ávísanir í bili.

„Þeir sem koma og skipta [Staxlox] í apótekum ættu að geta gert það. Síðan höfum bæði við og heilsugæslan og sóttvarnalæknir sent út tilkynningar til lækna um að velja aðrar meðferðir núna, velja ekki þetta lyf [Dicloxacillin Bluefish] sérstaklega. Það eru aðrar meðferðir í boði og það er til nóg af þeim sýklalyfjum,“ segir Rúna.

Þá gera þau ráð fyrir að birgðastaða á því lyfi verði komin í eðlilegt horf í næstu viku þegar önnur sending kemur með flugi.

„Við erum búin að tryggja það frá öðrum framleiðanda, í samvinnu við markaðsleyfishafana og heildsölurnar, svo það kemur til landsins í næstu viku. Við erum bara aðeins að komast fyrir vind svona næstu dagana,“ segir Rúna. 

Ekki liggur fyrir hvenær Staklox verði tekið aftur í notkun. Verið er að rannsaka málið og greina hver rótin er.