Fær bætur eftir að hafa hrasað um lista og dottið niður stiga

Maðurinn féll niður tíu þrepa stiga eftir að hafa hrasað og hlaut af því nokkur meiðsli. Hann bar fyrir sig aðra höndina í fallinu og lýsti miklum verkjum í höndinni við læknisskoðun.

Í dómi Landsréttar í málinu segir að slysið hafi ekki verið tilkynnt Vinnueftirlitinu þegar það varð og því hafi það ekki verið rannsakað. Þá segir að fyrir liggi að állistinn, sem maðurinn hrasaði um, hafi verið fjarlægður eftir slysið.

Þá segir að talið sé ótvírætt að rannsókn Vinnueftirlitsins áður en listinn var fjarlægður hefði verið til þess fallin að varpa ljósi áð aðstæður og ástæður slyssins. 

Vegna þessarar vanrækslu vinnuveitanda hafi frásögn mannsins, um að listinn hafi verið laus og staðið upp úr gólfinu, verið lögð til grundvallar.

Slysið á ábyrgð vinnuveitanda

Í dóminum segir að aðbúnaður á gistiheimilinu viki frá því sem má gera ráð fyrir vegna þess að állistinn skagaði upp úr gólfinu. Þess vegna hafi Landsréttur fallist á það með manninum að vinnuveitandi hafi brotið gegn almennum skyldum sem leiddar eru af lögum um aðbúnað, hollustuhætti og öryggi á vinnustöðum.

Því var slysið rekið til saknæmrar háttsemi vinnuveitandans og starfsmanna hans, annarra en þess slasaða, og vinnuveitandinn dæmdur bótaábyrgur en hann er tryggður hjá Sjóvá.