„Af hverju í ó­sköpunum fær þessi maður að endur­taka þetta aftur og aftur?“

Maðurinn hefur verið kærður fyrir frelsissviptingu og líkamsárás gegn barni. Drengirnir eru ellefu ára gamlir en maðurinn er á sjötugsaldri. Atvikið átti sér stað á sunnudagskvöld fyrir tæpri viku. Drengirnir gerðu dyraat hjá manninum og í kjölfarið sat hann fyrir þeim, réðst á einn drengjanna, dró hann inn á heimili sitt og læsti hann þar inni.

Faðir annars drengs braut rúðu á útidyrahurð hússins og tókst að koma drengnum út af heimili mannsins.

Segir manninn hafa setið fyrir drengjunum í þrjátíu mínútur

Foreldrar drengjanna tóku ákvörðun í sameiningu um að ræða ekki við fréttamenn. Móðir eins þeirra hefur tjáð sig um málið á samfélagsmiðlum og veitti Vísi leyfi til að fjalla um efni færslunnar.

Í færslunni segir konan að drengirnir hafi ekki haft hugmynd um að andlega veik hjón byggju í umræddu húsi, þeir hafi einfaldlega verið óheppnir. Hún tekur fram að þetta hafi ekki gerst í hita leiksins, líkt og hún orðar það, heldur hafi maðurinn leitað að drengjunum og setið fyrir þeim í að minnsta kosti þrjátíu mínútur.

Hún minnir á að ofbeldi eigi aldrei rétt á sér og að drengirnir séu ellefu ára gamlir.

Á sér sögu um ofbeldi af sama tagi

„Síðast en ekki síst langar mig að minnast á okkur sem samfélag,“ skrifar móðirin í færslunni. „Af hverju í ósköpunum fær þessi maður að endurtaka þetta aftur og aftur?“

Ástæða þess að móðirin veltir þessu upp er líklega sú að þetta er ekki í fyrsta skiptið sem maðurinn er ákærður fyrir brot af þessu tagi. Árið 2008 var hann ákærður fyrir að hafa ráðist á sautján ára dreng sem einnig hafði verið að gera dyraat hjá honum. Maðurinn var einnig sakfelldur fyrir að hafa numið fimmtán ára dreng á brott í bíl sínum sama ár.

„Við vitum öll hver hann er og hvað hann hefur gert, það er langt frá því talið á annarri hendi hversu oft hann hefur beitt barn ofbeldi og hvenær er nóg komið,“ skrifar móðirin í færslunni.

Samt spjöllum við í búðinni og bara alls staðar! Þar á meðal ég sjálf

Galið og grafalvarlegt mál

Konan segir marga hafa hlegið af manninum og sögunum af honum undanfarna daga, en telur að þeir myndu ekki hlæja ef það hefðu verið þeirra börn sem lentu í honum. „Að horfa uppá strákana sína í svona mikilli hræðslu og geðshræringu var ekki auðvelt og endilega prófum að setja okkur í þessi spor!“

Hún lýsir því að drengurinn hafi verið eltur uppi af ókunnugum manni, felldur niður í jörðina og dreginn inn í ókunnugt hús. „Ég allavega myndi tryllast af hræðslu, og ekki gleyma, þeir eru 11 ára,“ skrifar konan. Hún endar færsluna á þessum orðum:

Og svo vinirnir sem horfa uppá vin sinn dreginn í burtu! Þetta er galið og grafalvarlegt mál! Og einhvern veginn þarf að stoppa þennan mann! Þetta mun koma fyrir aftur ef það verður ekki gert.