Mið­vörður Víkinga mögu­lega með slitið kross­band

Mc Lagan hóf leikinn í hjarta varnarinnar ásamt Oliver Ekroth. Á 65. mínútu þurfti Mc Lagan að fara meiddur af velli. Fékk hann aðstoð við að komast inn í hús. Eftir leik mætti Arnar Gunnlaugsson, þjálfari, í viðtal á Fótbolti.net. Þar sagðist hann óttast það versta.

„Mestu áhyggjurnar núna eru varðandi Kyle, erum að bíða og vona að hann sé ekki með slitið krossband. Þetta leit ekki vel út, það návígi sem hann fór í,“ sagði Arnar en Víkingar misstu einnig Erling Agnarsson meiddan af velli.

„Þetta lítur bara hræðilega út. Við krossleggjum fingur og vonumst að niðurstaðan úr myndatökunni verði okkur jákvæð,“ bætti Arnar við.

Ljóst er að Víkingur mun sakna Mc Lagan sé hann með slitið krossband og frá út leiktíðina. Honum óx ásmegin á síðustu leiktíð, sinni fyrstu í efstu deild hér á landi, eftir að hafa gengið í raðir Víkinga frá Fram þar sem hann rúllaði upp Lengjudeildinni sumarið 2021.

Ásamt Mc Lagan geta þeir Ekroth, Halldór Smári Sigurðsson og Sveinn Gísli Þorkelsson allir spilað í miðverði. Þá hefur Matthías Vilhjálmsson einnig leyst þar af en hann var fenginn til liðsins frá FH til að spila framar á vellinum. Hvort það breytist nú kemur í ljós.

Víkingur heimsækir Stjörnuna í 1. umferð Bestu deildar karla þann 10. apríl næstkomandi.