Sport

Enn einn titillinn hjá Valgarð og Thelma vann í annað sinn í röð

Smári Jökull Jónsson skrifar
Valgarð Reinhardsson og Thelma Aðalsteinsdóttir með Íslandsmeistarabikarana.
Valgarð Reinhardsson og Thelma Aðalsteinsdóttir með Íslandsmeistarabikarana. Fimleikasamband Íslands

Valgarð Reinhardsson og Thelma Aðalsteinsdóttir vörðu bæði titla sína á Íslandsmeistaramótinu í áhaldafimleikum sem fram fór í gær. Titillinn er sá sjöundi sem Valgarð vinnur.

Mótið í gær var í umsjá fimleikadeildar Fjölnis og fór fjölþrautarkeppnin fram í gær en í dag verður keppt til úrslita á einstökum áhöldum.

Hart var barist í kvennaflokki en þar var það Thelma Aðalsteinsdóttir sem náði að verja titil sinn síðan í fyrra en hún hlaut í heildina 48.400 stig. Thelma keppir fyrir hönd Gerplu. Í öðru sæti voru þær Margrét Lea Kristinsdóttir úr Björk og Hildur Maja Guðmundsdóttir úr Gerplu en þær hlutu báðar 47.550 stig.

Þetta er annað árið í röð sem Thelma verður Íslandsmeistari í fjölþraut.

Í karlaflokki vann Valgarð nokkuð öruggan sigur með 77.065 stig. Martin Bjarni Guðmundsson úr Gerplu varð í öðru sæti með 74.565 stig og þriðji varð Atli Snær Valgeirsson einnig úr Gerplu með 74.231 stig.

Einnig var keppt í unglingaflokki og þar urðu Lúkas Ari Ragnarsson úr Björk og Lilja Katrín Gunnarsdóttir úr Gerplu meistarar en þau unnu bæði nokkuð örugga sigra.

Fimleikar

Mest lesið


Fleiri fréttir

Sjá meira


×

Mest lesið