Hand­tekinn á heimili sínu og er til rann­sóknar hjá héraðs­sak­sóknara

Greint var frá því í gær að Innheimtustofnun sveitarfélaga hafi verið dæmd af Héraðsdómi Reykjavíkur í lok marsmánaðar að greiða starfsmanni, kvenkyns lögfræðingi, rúmar nítján milljónir króna vegna fjörutíu mánaða kynbundins launamunar. Aldís Hilmarsdóttir, formaður stjórnar, sagði í samtali við fréttastofu að málið hafi komið upp í tíð fyrri stjórnenda.

„Ég kom aldrei að kjarasamningum gagnvart þessu fólki, sem þetta snýr að. Þetta var ákvarðað af Sambandi íslenskra sveitarfélaga, kjarasviði sambandsins, og BHM. Þegar niðurstaða lá fyrir að tveir yngri lögfræðingar skyldu hækka í launum og tveir eldri skyldu lækka í launum þá beindum við því til sambandsins og BHM hvort ætti ekki að lækka laun þessara sem voru hærra launaðir. Við fengum einfalt svar, sem var skriflegt: Nei,“ segir Jón Ingvar Pálsson, fyrrverandi forstjóri Innheimtustofnunar, í samtali við fréttastofu en hann sendi yfirlýsingu frá sér í dag vegna málsins. 

„Ég veit ekki hvað skúffusamningur er“

Í dómi héraðsdóms er haft eftir lögfræðingnum að yfirmaður hennar hafi talað um að skúffusamningar hafi verið gerðir við karlkyns lögfræðinga stofnunarinnar.

„Ég veit ekki hvað skúffusamningur er. Þessu hefur verið einhliða borið á mig, að ég hafi notað þetta orðalag. Ég hef aldrei notað þetta orð, skúffusamning, og ég veit ekki hvað það á að vera einu sinni,“ segir hann.

Jón stefndi Innheimtustofnun nýlega fyrir dóm vegna vangoldinna launa og jafnframt hefur hann kvartað til Persónuverndar vegna meintrar uppflettingar stofnunarinnar á honum hjá Skattinum, sem hann segist í yfirlýsingu hafa fengið staðfesta hjá Skattinum. Hann segir enga tilviljun að dómur héraðsdóms hafi verið birtur núna.

Þá að dómurinn sé birtur til að grafa undan þessum kröfum þínum?

„Að mínu mati já, meðal annars,“ segir Jón Ingvar. 

Þess ber að geta að það eru ekki óalgeng eða óeðlileg vinnubrögð hjá dómstólum að birta dóma opinberlega nokkru eftir að þeir hafa verið kveðnir upp. Dómur í þessu máli var kveðinn upp 29. mars en birtur nokkrum dögum síðar. RÚV fjallaði um dóminn á laugardag og Vísir greindi svo frá í gær að um Innheimtustofnun væri að ræða. 

Kostir og gallar að útvista verkefnum til fyrirtækja starfsmanna

Í apríl í fyrra var Jóni og Braga Axel Rúnarssyni forstöðumanni hjá stofnuninni sagt upp störfum, meðal annars fyrir að hafa útvistað innheimtuverkefnum til fyrirtækis í eigu Braga. Báðir höfðu verið sendir í leyfi í desember 2021 í kjölfar úttektar Ríkisendurskoðunar á verkefnum stofnunarinnar.

Í umfjöllun DV um stofnunina árið 2019 kom fram að fyrrverandi starfsmenn Innheimtustofnunar hefðu vitnað til um andlegt ofbeldi, einelti, ógnarstjórnun, yfirgang gegn konum, margföld trúnaðarbrot og furðuleg afskipti af einkalífi starfsfólks.

„Mér var vikið þarna í burtu bótalaust og með rökum sem fá engan vegin staðist. Það var ekki hlustað á neitt af mínum sjónarmiðum, ég fékk engin gögn í hendur. Það er liðið eitt og hálft ár og ég hef ekki einu sinni fengið tölvupóstinn minn. Þetta er allt á sömu bókina lagt: Engin svör, engin gögn. Ekkert.“

Málið er til rannsóknar hjá héraðssaksóknara og nokkrir með réttarstöðu sakbornings.

Ert þú einn af þeim sem hefur réttarstöðu sakbornings?

„Já, ég hef þann vafasama heiður. Eitt af þessum asnaspörkum þarna henda inn kæru gegn betri vitund að mínu mati. Þetta fólk vissi alveg hvað það var að gera, það er bara hvaða leið það var að fara. Þetta er alveg ómaklegt. Það er meira en ár síðan þessi kæra fór inn. Ég var handtekinn á heimili mínu og dreginn niður í yfirheyrslu og hef ekki heyrt hóst eða stunu frá þessu fólki síðan,“ segir Jón Ingvar. 

„Þessi útvistun verkefna, fólk getur greint á um það. En hver greiddi fyrir það? Það var ekki Innheimtustofnun, það voru þeir sem stóðu ekki skil á meðlögum. Það var enginn annar sem borgaði. Stofnunin borgaði aldrei eina einustu krónu, það er kjarni málsins. En innheimtan jókst ef ég man rétt um 73 milljónir á árinu 2020 og um 120 árið 2021 beinlínis út af þessum aðgerðum.“

Er ekki vafasamt að verkefni sem stofnunin átti að inna af hendi hafi verið útvistað til fyrirtækis í eigu starfsmanns?

„Það hefur kosti og galla. Það er þekking, kunnátta. Fólk getur algerlega haft þá skoðun. En þetta fólk vann að þessu, það var stóraukin innheimta. Innheimtukrafturinn var aukinn verulega með þessum árangri. Þessi kæra er eitthvað sem mér finnst alveg út í hött,“ segir Jón Ingvar og bætir við að hann hafi engar upplýsingar fengið um stöðu málsins hjá héraðssaksóknara.

Segir Innheimtustofnun undir stjórn Framsóknar

Í yfirlýsingu sem Jón sendi frá sér í dag vegna málsins sagði hann meðal annars að ný stjórn, að undirlagi Sambands íslenskra sveitarfélaga og innviðaráðuneytisins, hafi lagt sig í líma við að koma höggi á fyrri stjórnendur Innheimtustofnunar. 

Þá sé stofnunin undir fullri stjórn og ákvörðunarvaldi ákveðins stjórnmálaflokks og fyrir hans tilstilli verið að flytja alla helstu starfsemi stofnunarinnar norður í land. Hann segir ekkert leyndarmál hvaða flokkur það er.

„Það er Framsóknarflokkurinn. Þeir eru með tögl og haldir í þessu, vilja fá störfin út á land, sem er skiljanlegt. En framkoma og framganga þessara manna og innan ráðuneytis, bæði fyrrverandi og núverandi, er með eindæmum,“ segir Jón. 

„Fólk getur greint á um einhverja hluti en ef það greinir á þá talar það saman. Þetta fólk kann það ekki, veit ekki hvað það er. Ég hef ekki fengið ein einustu svör upp úr þessu fólki nema það hefur bent á einhvern lögmann og hann hefur ekki svarað mér heldur.“