Fjórtán laxa opnun í Norðurá

Með væntingarnar hófstilltar mættu veiðimenn við bakkann í gærmorgun en það er svo til sami hópurinn búinn að opna ána í nokkur ár. Veiðitölur eftir fyrsta dag gefa væntingar um að loksins gæti verið veiðisumar framundan sem er yfir meðallagi en samtals var fjórtán löxum landað en það var sett í mun fleiri. 

það var mikið líf á nokkrum stöðum, í raun svo mikið að ekki allir veiðistaðir voru prófaðir og bíða því dagsins í dag.  Hornbreiða gaf stærsta laxinn í gær sem mældist 94 sm og annar stórlax slapp af við Hræsvelg eftir 45 mínútna baráttu. Þetta eru góðar fréttir fyrir árnar á vesturlandi og aðallega vegna þess að mest af veiðinni var tveggja ára lax og eins árs laxarnir sem veiddust voru vel haldnir. Eftir fjögur frekar mögur ár gætum við loksins verið að fá ár með veiðitölum yfir meðallagi.