„Þetta eru risastórar fréttir“

Björn öllum hnútum kunnugur er kemur að fjármálum og íþróttum og fréttirnar um samstarf Fjárfestingasjóðs Sádi-Arabíu við PGA- og DP mótaraðirnar í golfi fóru ekki fram hjá honum.

„Þetta eru auðvitað risastórar fréttir,“ sagði Björn í Sportpakkanum á Stöð 2. „Ég held að á fjármálahliðinni í íþróttunum höfum við nú varla heyrt stærri fréttir undanfarin ár eða áratugi. Þetta eru heilmiklar fréttir vegna þess að í rauninni, með ákveðinni einföldun, mættum við segja að með þessu sé konungsfjölskyldan í Sádi-Arabíu að kaupa efsta lag golfíþróttarinnar.“

Fjárfestingasjóður Sádi-Arabíu, betur þekktur sem PIF, samanstendur af olíupeningum Sádi-Arabíu og heyrir undir konungsfjölskyldu ríkisins.

„Við getum kallað þetta þjóðarsjóð eða fjárfestingasjóð Sádi-Arabíu og þessi sjóður er að langmestu fullur af olíupeningum en það hefur verið lögð áhersla á það núna að setja eggin í svolítið fleiri körfur. Að bæta úr eignardreifingu þessa stóra og mikla eignasafni Sádanna og áberandi hluti af því hefur verið gert í gegnum íþróttir.“

Það var árið 2021 sem LIV mótaröðin, sem var keyrð áfram á fjármagni frá Sádi-Arabíu, var stofnuð til höfuðs PGA mótaröðinni og náði hún að lokka til sín nokkra af helstu kylfingum heims.

Síðan þá hefur ríkt hatrömm deila þeirra sem standa á baki mótaröðunum tveimur og því koma nýjustu fréttir því mörgum á óvart. Óvíst er hvað tekur nú við og hver örlög LIV mótaraðarinnar verða.

„Nú spyrjum við okkur að því, hvað verður til dæmis um LIV-mótaröðina. Er ekki akkúrat ástæðan fyrir því að vera gera þetta til þess að allir þessir kylfingar séu að spila í sömu mótunum og var það ekki það sem í raun og veru gerðist, þegar verið var að kljúfa þetta í sundur, að það svolítið vantaði.

Við eigum svo sem eftir að sjá hvernig spilast úr því en það er ekki ólíklegt að LIV-mótaröðin hreinlega leggist af. Vegna þess að Sádarnir stjórna PGA-mótaröðinni núna, ekki að fullu og ekki eingöngu en það verður smíðuð regnhlíf yfir þetta nýja apparat sem sá sem stýrir peningum PIF, sá sem stýrir olíufyrirtæki Sádi-Araba mun stjórna.“

Konungsfjölskyldan í Sádi-Arabíu er sökuð um íþróttahvítþvott, að beita íþróttum til þess að fegra eða fela slæmt orðspor sitt.

„Gagnrýnendur þessara viðskipta hafa bent á að þetta sé augljóst framhald af því sem Sádi-Arabía hefur gert hingað til, sem talið er hafa verið mikill íþróttahvítþvottur. Það þarf svo sem ekki að koma á óvart því staðreyndin virðist vera sú að þessi íþróttahvítþvottur virkar.

Það eru ekki bara Sádar sem hafa góða reynslu af því í þessu samhengi, heldur aðrir líka og hvort sem ástæðan sé sú að þetta sé eðlilegur partur af fjárfestinga mengi sádiarabíska fjárfestingasjóðsins eða hvort að þessu sé ætlað að þvo ímynd Sádi-Arabíu alþjóðlega í gegnum íþróttirnar þá mun það án efa hafa mjög jákvæð áhrif fyrir Sádana og á það hljóta þeir að treysta líka.“