„Áttum aldrei að tapa þessum leik“

„Sérstaklega miðað við fyrri hálfleik þar sem við erum að fá ótrúlega mikið af færum og það er mikill klaufaskapur hjá þeim. Við eigum bara að gera betur því við fáum fullt af góðum uppleggjum og færum og við eigum bara að klára þennan leik í fyrri hálfleik í rauninni.“

„Í seinni hálfleik missum við aðeins tökin. Þeir koma aðeins ofar á völlinn og við aðeins aftar og náum ekki að setja jafn mikla pressu. En við áttum aldrei að tapa þessum leik.“

Þá segir Alfreð að auðvitað hafi það haft áhrif á leikplanið að missa fyrirliðann Aron Einar Gunnarsson í meiðsli í upphitun.

„Auðvitað. Við erum búnir að leggja upp með ákveðið leikplan alla vikuna og æfa mikið og ákveðna hluti. Það eru að koma nýir menn inn með nýjar áherslur. En það á ekkert að hafa úrslitaáhrif. Það munar náttúrulega um alla, en mér fannst við eiga að klára þetta með það lið sem við höfðum.“

Alfreð bætir einnig við að tapið sé sérstaklega svekkjandi í ljósi þess að markið sem skildi liðin að var hálfgert skrípamark.

„Það er náttúrulega extra svekkjandi. Þeir eru ekki að búa sér til mikið af færum í seinni hálfleik og svo kemur svona mark. Þeir skapa sína eigin heppni og allt það en við áttum bara að vera klókari í fyrri hálfleik og aðeins betri og með meiri gæði í færunum sem við fengum.“

Alfreð var tekinn af velli eftir um klukkutíma leik, en segir það ekki hafa verið ákveðið fyrirfram að hann myndi ekki spila meira í kvöld.

„Þjálfarinn ræður því bara. Þetta var kannski ekkert óskaundirbúningur fyrir mig fyrir þennan leik, en maður gerði það besta úr því. Við náðum kannski ekki að pressa nógu vel á þá í seinni hálfleik og hann vildi kannski bara fá ferskar lappir inn til að ná að gera það. En ég er alltaf klár í að spila eins mikið og ég get. Þetta er bara ákvörðun þjálfarans.“

Eftir tapið er íslenska liðið nú í strembinni stöðu í riðlinum fyrir leik liðsins gegn Portúgal sem fram fer eftir þrjá daga. Alfreð segir að nú þurfi liðið bara að þjappa sig saman og hefna fyrir tapið þegar haldið verður til Slóvakíu.

„Við verðum bara að fara til Slóvakíu og sækja sigur og taka stig á móti Portúgal. Þetta er ekkert flókið og við förum ekkert að vorkenna sjálfum okkur. Það er ekkert fyrirfram ákveðið hvað gerist í riðlinum, hann er enn opinn. Við erum núna aðeins í mínus eftir þetta tap, en við munum snúa okkur í hag.“

Þá segir hann að leikmenn geti verið svekktir í kvöld, en svo sé fullur fókus á Portúgalsleikinn á morgun.

„Við getum alveg verið svekktir í dag og í kvöld, en svo er bara nýr dagur á morgun. Þá fer fullur fókus á Portúgal og það verður allt öðruvísi leikur á móti töluvert betra liði með betri einstaklinga. Það er enginn vafi á því, en við förum bara fulla ferð í þann leik og með kassann úti.“